MELUAN: Iring tuai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg majak nyungkak pemansang komprehensif ba sitak Kunsil Nengeri (DUN) Meluan, lebih agi ba pengawa nyendia infrastruktur enggau transformasyen digital.

Kaban Kunsil Nengeri (ADUN) Meluan, Dato Rolland Duat Jubin madah, macham projek pemansang udah mujur dikeamat kenyau Premier Sarawak megai nengeri tu, lalu mai ubah nyengala ngagai pengelantang rayat, lebih agi ba kandang menua ulu sungai.

Nitih ku iya, sebedau tu Meluan bisi suntuk ba pemansang baka jalai alun, bekal ai enggau karan, tang diatu udah bisi ubah.

“Nyentuk diatu, semak 90 peratus menua ulu sungai Meluan udah bisi bekal karan nengah sambung grid, lalu pengawa ngaga sereta nyeleti jalai alun agi benung digaga dikena nentuka jalai ti likun agi sereta efisyen,” ku iya.

Iya madah munyi nya ba siti program nerang penyulut iring tuai Premier Sarawak ba pengawa nyungkak pemansang di sitak DUN Meluan, ditu, Hari Tiga tu tadi.

Nambah ke jaku iya, iya madah, Meluan bela nerima pemaik ari agenda transformasyen digital nengeri alai nyauka semua kandang menua dia diatu udah bisi arus 4G lalu muka peluang ekonomi baru.

Berebak enggau nya, iya madah, pengawa bejadi Jematan Nanga Lasi ke dipenyadi Premier Sarawak siti pemeri besai ti mai penguntung ngagai peranak menua nya.

Iya enggau nya meri besai terima kasih ngagai Premier Sarawak ke pengeransing nentuka pemansang sebela enggau inklusif ba selampur nengeri.-EDISI UKAS