Datuk Abdullah Saidol Nerima Penemuai Basa Direktor AKM Sarawak
KUCHING: Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol nerima penemuai basa ari Direktor Akademi Kenegaraan Malaysia (AKM), Mohamad Faizal Lamat ba Indu Opis Unit Komunikasi Awam Sarawak (UKAS) ditu, Hari Lima.
Tuju penemuai nya dikena bekunsi tanggungpengawa akademi ke nyadi palan pemansang kapasiti iring tuai sereta negap nilai nasionalisme ba servis perintah.
Berebak enggau nya, Datuk Abdullah nimbal manah inisiatif nya lalu madahka sukung ngagai pengeransing ngenegap kerejasama entara Perintah Sarawak enggau Opis Menteri Besai nengah AKM seriris enggau juluk ati nyungkak profesionalisme sereta pengulih komunikasyen strategik servis perintah.
Maya nya, raban AKM bela ngena awak nya nerangka pejalai macham latih enggau program pemansang kompetensi, nyengkaum kus iring tuai, atur perintah, komunikasyen strategik enggau ngentap nilai patriotisme ngagai orang gawa perintah ba renggar Perintah Besai enggau Sarawak.
Kelimpah ari nya, pengawa besilih penemu bekaul langgur kerejasama strategik serimbai ngintu Hari Bujang Berani mega dirandau, lebih agi ba pekara bekaul nasionalisme, komunikasyen perintah enggau kaul orang gawa perintah ngambi narak semangat patriotisme.
Sama datai ba penemuai nya, Direktor UKAS, Awang Putrayusrie Awang Redzuan. -EDISI UKAS
