SWLC Digagaka Nama Baru Nyadi Kursi Datuk Amar Juma’ani
KUCHING: Kursi Iring Tuai Indu Sarawak (SWLC) deka digagaka nama baru nyadi Kursi Datuk Amar Juma’ani ba pengeransing ngenegap raban indu ba pekara pengelandik sereta iring tuai.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, kursi tu deka nyadi pelasar lebih agi dikena bejalaika pansik silik senentang isu bekaul iring tuai indu.
Nitih ku iya, kursi nya mega ngaul pemansang enggau pejalai program ti ngembuan tuju nyungkak pengelebih, kompetensi serta kaul orang indu Sarawak ba macham sektor.
“Tanggungpengawa Kursi Datuk Amar Juma’ani, iya nya bejalaika program ti ngaul latih sereta kaul komuniti, ti diatur nengah kerejasama begulai enggau bakih strategik baka Institut Iring Tuai Servis Perintah Sarawak, Palan Penyulut Betikas Sarawak, Tabung Ekonomi Gagasan Anak Sarawak (TEGAS) enggau Palan Penyulut Teknologi Sarawak (CENTEXS).
“Kursi tu ditumbuh enggau tuju dikena ngenegap indu nengah pelajar sereta latih pengelandik, nengah bejalaika kerejasama enggau institusyen bekaul baka ke udah disebut aku tadi,” ku iya.
Iya madah munyi nya ba aum media pengudah ngulu Aum Kaunsil Indu enggau Ruang Bilik Sarawak (MWKS) di Wisma Wanita ditu, Hari Lima.
Iya ti mega chairperson MWKS madah, Perintah Sarawak udah ngagih belanja RM5 juta ‘one-off’ ungkup guna kursi nya.
Bekaul belanja pelajar tiga iku nembiak indu ba program Sarjana Sastera ba Pemansang Iring Tuai di ‘Asian Women Leadership University College (AWLUC)’, Dato Sri Fatimah madah, kohort keterubah ke dipelanja nya deka ngepunka pelajar sida bulan Februari taun tu.
Ungkup ngambi kohort taun 2027, iya madah pengawa ngambi udah dibuka ba ‘website’ Opis Indu enggau Ruang Bilik Sarawak (JWKS) ke alai indu Sarawak tau nganjung peminta enggau ‘resume’ ngagai JWKS.
“Kitai deka bisi siti panel ke deka nisih semua peminta ke diterima dikena nentuka chalun ke patut ungkup kohort kedua, ke disadang berengkah kena Februari 2027,” ku iya nerang baru.
Sama datai, Sapit Menteri Pemansang Indu, Nembiak Mit enggau Pengelantang Komuniti Sarawak ke mega Sapit Chairman MWKS Datuk Rosey Yunus, Sekretari Mendam KPWK Nur Alina Abdullah @ Colliner Gohe, Ex-Officio MWKS Riziandy Nawawi, Sekretari MWKS ti mega Direktor JWKS Salmah Jobeli sereta kaban MWKS ke bukai. -EDISI UKAS
