KUCHING: Yang di-Pertua Negeri Sarawak Tun Pehin Sri Dr. Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi nerima penemuai basa ari Menteri Pengerai Datuk Seri Dzulkefly Ahmad ba rumah iya, ditu, Hari Lima.

Tuju penemuai basa nya dikena ngenataika pemansang pemadu baru bekaul inisiatif Opis Menteri Pengerai Malaysia (KKM), lebih agi bekaul pengeransing ngenegap pemansang enggau negap sistem pengerai di Sarawak.

Penemuai urung sejam nya mega alai besilih penemu bekaul macham pekara bekaul sektor pengerai, nyengkaum guna ngenegap infrastruktur perubat sereta negap kerejasama strategik entara Perintah Besai enggau Perintah Sarawak.

Randau mega bekaul nyungkak pengawa ngenatai servis pengerai ngagai rayat, lebih agi nengah ngemanah perengka guna ke bisi sereta ngerembai akses servis pengerai ba kandang menua pesisir enggau ulu sungai.

Kelimpah ari nya, bela dirandau nyengkaum pemesai reti ngena teknologi enggau chara baru sistem pengerai dikena nambah penyikar atur sereta kualiti berubat.

Sama datai, Sapit Menteri Pengerai Dato Hanifah Hajar Taib.-EDISI UKAS