LAWAS: Pemansang infrastruktur ba Stesyen Nupi Kerebau Maragang GreenValley Dairy Sdn Bhd nyeremin komitmen meruan Perintah Sarawak dikena negap industri pemakai lokal, kelebih agi sektor mit tusu kerebau.
Sapit Menteri Industri Pemakai, Komoditi enggau Pemansang Kandang Menua Sarawak Datuk Dr Abdul Rahman Ismail madah, pengawa nya ukai semina nyukung agenda jamin bekal pemakai nengeri tang mega ngerandang peluang ekonomi baru ngagai komuniti lokal.
“Pemansang infrastruktur tu bukti pengeran Perintah Sarawak negap industri pemakai lokal kelebih agi sektor mit tusu kerebau ti bisi pengulih besai dikemansang chara komersial sereta meruan,” ku iya.
Iya madah munyi nya pengudah ngatur ngetuai pejalai ngabas seraya gawa ngagai stesyen nupi kerebau ngambi berati ke pemansang pemadu baru fasiliti nya kena Hari Enam.
Datuk Dr Abdul Rahman mega nyemetak madah, inisiatif begulai ngaul sukut nupi, nginjin enggau pakar teknikal beguna amat nentuka pengawa ngasil produk bekualiti tinggi ti ulih rembus ngagai makit besai agi.
Tuju pejalai ngabas nya dikena berati ke terus pengawa nyeruri infrastruktur ti nyukung projek mansut cheese bepelasarka tusu kerebau chara berurun enggau maju.
Entara fasiliti ti udah tembu digaga nyengkaum stesyen feedlot, kilang ngaga cheese sereta gudang penyimpan ti nyadi komponen beguna ba rentayan pemansut produk tusu.
Sama datai, Penulung Pegawai Veterinar Opis Servis Veterinar Lawas Robine Asut, Tuai Pegawai Eksekutif Maragang GreenValley Dairy Sdn Bhd Dr Raja Imran Shah, Tuai Pegawai Operasyen Maragang GreenValley Dairy Sdn Bhd Suzie Balung, Konsultan Maragang GreenValley Dairy Sdn Bhd Dr Nur Husna Abdul Rahman, Konsultan Maragang GreenValley Dairy Sdn Bhd Muhammad Ariff Mohd Adzeman sereta Pakar Ngaga Cheese Dr Lorenzo Garigllo.-EDISI UKAS
