Rayat Meseti Ngerebut Inisiatif Endowment Fund Sarawak
KOTA SAMARAHAN: Nembiak mit ba kandang menua pesisir Sarawak dikelala entara raban pemadu suah kena tinggal ari pemaik inisiatif Endowment Fund Sarawak lebuh agi tubah apai indai apin muka akaun turu belanja nya taja disedia agih belanja RM1,000 ungkup anak Sarawak ti baru ada.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, inisiatif perintah nengeri nya disedia khas dikena nyaup ruang bilik ti napi penanggul suntuk belanja kelebih agi ba menua ulu enggau menua pesisir ngambi besikap tumu ungkup pelajar anak sida.
“Endowment Fund Sarawak nya mekanisme beguna nyaup anak Sarawak kelebih agi ari menua pesisir, bisi duit simpan lebuh umur sida manggai 18 taun.
“Tu ulih dikena nampung pelajar tauka latih pengelandik sereta ngerandang peluang pansut ari pemerinsa idup,” ku iya.
Iya madah munyi nya lebuh dirandau pemberita serimbai Pengerami Bejadi Chegu Aiman Gold & Gadget Pampang Kota Samarahan kena Hari Enam.
Ku iya, belabuh ari taun 2026, atur Endowment Fund Sarawak deka dipejalai nengah Affin Bank nengah chara nyimpan enggau meranak puku bepelasarka emas nentuka rega belanja nya nambah enggau meri untung besai ngagai penerima kelebih agi anak ari ruang bilik kurang penatai pemisi.
Taja pia, tikas apai indai ti ngambi bagi apin nyapai selinting perintah nengeri iya nya abis nadai 80 peratus anak ti baru ada ba Sarawak enggau isu kurang pengeleda sereta penanggul penerang ba menua pesisir dikelala entara kebuah besai.
“Mayuh apai indai ba menua pesisir apin ngeleda ke turu belanja tu bisi tauka meragam atur nganjung peminta mayuh kelikuh.
“Tang kebendar, turu belanja nya hak anak Sarawak lalu perintah nengeri deka nentuka nya ulih dikases semua nadai ngira endur,” terang iya.
Berebak enggau nya, perintah nengeri diatu ransing nanggam kerejasama enggau hospital sereta klinik pengerai, nyengkaum ba menua ulu nentuka pengawa rejister Endowment Fund Sarawak ulih dipejalai pengudah anak mit ada kelimpah nyendia pilih peminta chara manual enggau digital.
Iya nyemetak madah ke Endowment Fund Sarawak ukai semina bantu belanja tang mega pengawa meranak puku timpuh panjai ba pemansang modal mensia nengeri, kelebih agi nentuka anak menua pesisir enda majak tinggal ba akses ngagai pelajar tinggi.
“Inisiatif tu chara nentuka pekara wang ukai semina penekul ngagai pelajar anak Sarawak.
“Tang, pemujur nya bepanggai ngagai pengeleda enggau pengawa apai indai ngerebut peluang ti disedia,” terang iya. — EDISI UKAS
