KOTA SAMARAHAN: Perintah Sarawak entap penemu nentuka pemansang nengeri dikemansang bepuguka integriti, pengelurus enggau pengandal rayat nengah ngatur Program Meri Pengeleda Pemansang Integriti Begulai Enggau Komuniti (CIB) ti diatur ba Balai Gerempung Orang Bumai Nengeri Sarawak (PPNS), ditu kena Hari Minggu.

Menteri Dagang Temuai, Industri Kreatif enggau Seni Pemerindang Sarawak ti mega Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, program nya ukai semina siti pengawa narak pengeleda tang mega nyadi kelai nyata Sarawak deka terus maju ngena chara ti betul enggau bisi integriti.

“Sehari tu ukai semina program. Tu kelai Sarawak ukai semina deka maju tang mega deka maju enggau betul. Ukai semina manah ba luar tang mega tegap ari dalam lalu rayat ulih pechaya sereta andal,” ku iya lebuh bejadi program nya.

Ku iya, integriti enda tau bemusin tauka bepanggai ngagai pengawa matau aja tang meseti nyadi budaya ba sistem atur pengawa enggau pengidup komuniti besehari-sehari.

Ku iya, integriti kebendar diuji lebuh pekara ti betul tetap dikereja taja enda dipatau tauka dieprati.

“Integriti ukai semina lebuh bisi kamera, audit tauka diperati media. Integriti nya lebuh nadai siku pen orang meda, kitai tetap ngereja pengawa ti betul,” ku iya nyemetak.

Ku iya, integriti ukai semina bekaul penyalah makai suap tang nyeramin penyikar mutar sebana rayat, nitih ke spesifikasyen projek, ngena kuasa belebas sereta penau ngamatka semaya ngagai komuniti.

“Rayat ulih nerima saut ti pait tang rayat enda ulih nerima nyema kitai enda ngereja pengawa. Nya kebuah, integriti meseti dibantai nengah atur enggau mutar penanggul, ukai penerang aja,” ku iya baru.

Nambah ke nya, iya nyemetak madah ke pemesai guna pengawa matau begulai tauka co-monitoring ti nyadi pugu Program CIB, lalu komuniti diangkat nyadi bakih strategik Raban Bekuasa Lokal (PBT), agensi enggau raban pengatur.

“Enti semua dikereja kediri, isu tu nyadi panjai. Enti semua begulai, isu tu nyadi pandak. Ba sistem diatu, kitai deka isu nyadi pandak, ukai rayat ti pulai ke lelak,” ku iya nyemetak.

Kelimpah ari nya, Sapit Menteri ba Opis Premier Sarawak (Integriti enggau Ombudsman), Dato’ Murshid Diraja Datuk Dr Juanda Jaya madah, Program CIB nya siti reformasyen sosial enggau nipak juluk Sarawak nempa atur pengawa ti entap enggau bisi integriti agi.

“Integriti ukai slogan, ukai pengias ba banner. Integriti nya budaya ti idup ba pemutus ba chara kitai ngesan pangku pengawa enggau pemerani ngemetul pengelemi,” ku iya.

Iya madah baru, sebana rayat meseti dipeda nyadi pun data besai dikena ngemanah sistem ngenatai servis kelebih agi ba renggat PBT ti nyadi raban gawa ba luan perintah sereta pemadu semak enggau rayat.

“Lebuh integriti tegap, pengandal rayat ngagai institusyen deka nambah lalu pengudah pengandal nambah, pengawa ngenatai servis deka nemban enggau berurun agi,” ku iya.

Sama datai, Direktor Unit Integriti enggau Ombudsman Sarawak (UNIONS) Wan Mohamad Wan Drahman, Tuai Pegawai Sektor Operasi Institut Integriti Malaysia (IIM) Harisham Ibrahim, Sapit MPKS Kr Daily Joseph sereta pengari Residen Bagi Menua Samarahan Rahimah Salwa Hamdan. - EDISI UKAS