MARUDI: Juluk peranak ba sitak Tanjung Upar disikap bekal kuasa karan 24 jam nyadi nyata pengudah projek sambung bekal kuasa karan ngena Rural Electrification Scheme (RES) mujur dipejalai.

Projek besai nya mega mai ubah besai ngagai pengidup peranak menua pesisir ba sitak Kunsil Nengeri (DUN) Mulu ti sebedau tu semina bepanggai ngagai kuasa solar.

Sapit Menteri ba Opis Premier Sarawak (Pengereja Pengawa, Imigresyen enggau Patau Projek) ti mega Kaban Kunsil Nengeri (ADUN) Mulu Datuk Gerawat Gala madah, pejalai projek RES nya bukti komitmen Perintah Sarawak nentuka peranak menua ulu mega disikap perengkaguna pemun seikas enggau mengeri.

“Tu hari ti chukup besai reti ngagai peranak Rumah Vincent, Rumah Philip, Rumah Mugang enggau Rumah Jipun ba sitak Tanjung Upar.

“Projek beungkus RM7.1 juta tu dipejalai nengah projek RES nyadi inisiatif perintah ngemansang sitak menua ulu taja jauh ari mengeri,” ku iya lebuh bejadi projek nya ba Rumah Vincent, Tanjung Upar, kena Hari Lima.

Ku iya, pengawa nyendia perengkaguna pemun baka kuasa karan, ai beresi enggau rentayan jalai semampai dikemerat Perintah Sarawak nipak juluk ngubah kualiti idup rayat menua pesisir.

Ngenang isu bah ti suah nyadi dia, iya madah ke perambu mindahka peranak ngagai endur ti tinggi agi ba renggat dipejalai berindik ari taba nya besibil enggau tanah kediri.

Pia mega ku iya, bekal ai beresi ba sitak nya deka dilempai ngagai raban Agensi Pemansang Tanah Tinggi (HDA) ngambi berati enggau nyerenih nentuka peranak disikap bekal ai beresi.

Ba pengawa nya, Datuk Gerawat mega ngemendar sekeda agih belanja nengah Geran Projek Mit Pemansang Menua Pesisir (MRP) DUN Mulu, nyengkaum RM3,000 sepintu ngagai lapan pintu bilik di Rumah Vincent dikena nyeruri rumah.

Iya mega ngemendar agih belanja RM5,000 dikena ngaga jalai semin ke sungai ti deka dipejalai peranak dia chara beripai.

Komiti Pemansang enggau Pengelikun Genturung Pendiau (JKKK) Rumah Vincent mega nerima agih belanja RM7,000 dikena ngatur aktiviti ninting taun seraya Unit Sarakup Indu Dayak Sarawak (SIDS) Rumah Vincent nerima RM4,000 dikena meli kipas ba ruai rumah panjai nya.

Datuk Gerawat mega meransang peranak ti benung berumah panjai ngambi minta jali berumah panjai ari Kaunsil Pemansang Pengawa Berumah (HDC) dikena ngelempung tating bebeli ke kereban berumah.

Kelimpah ari nya, Tuai Rumah Vincent madah ke pengawa nya besai reti ngagai peranak Tanjung Upar ti diatu ngasai bekal kuasa karan 24 jam.

Ku iya, projek sambung bekal kuasa karan nya meri penampak baru ngagai peranak nyerumba taun baru 2026 enggau perengkaguna ti lama udah dianti sida.

“Sebedau tu, peranak semina bepanggai ngagai kuasa solar. Nengah pemisi bekal kuasa karan tu, pengidup kami jauh berubah enggau lantang agi,” terang iya.

Nya alai, iya meri besai terima kasih ngagai Datuk Gerawat sereta Perintah Sarawak ti semampai meri perati ngagai peminta peranak menua ulu. - EDISI UKAS