Singapura Merambu Deka Ngaga Opis Konsulat Di Kuching
KUCHING: Singapura merambu deka ngaga opis konsulat di Kuching enggau Kota Kinabalu dikena ngenegapka agi kaul sereta nyungkak kerejasama ekonomi enggau kerejasama dua buah menua.
Pesuruhjaya Tinggi Singapura ke Malaysia, Vanu Gopala Menon madah, opis nya ila disadang deka berengkah dibuka pengabis laun tengan taun tu.
"Perintah Malaysia udah meri kami pemendar muka konsulat di Kuching enggau Kota Kinabalu. Tu diterima kami ujung November taun siti tadi.
"Nya alai, aku nemuai ngagai Malaysia, Sarawak enggau Kota Kinabalu meda kediri sereta nentu endur ke tau alai numbuh opis tu," ku iya madah ngagai media ditu, Hari Satu.
Dulu ari nya iya ngatur penemuai basa ngagai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kompleks Satria Pertiwi.
Vanu nangkan nya ngarap pekara tu bulih pemedar ari Opis Menteri Luar Malaysia lalu nganjung pengari sida ngatur opis konsulat nya ila.
Nerang enggau silik, iya madah, dagang Sarawak enggau Singapura ke diatu endang manah lalu begunaka pengari Singapura bisi ba menua tu empu dikena ngemuntangka agi kerejasama ekonomi.
Iya andal konsulat Singapura di Kuching ila deka ngenegapka agi kaul dua buah menua.
Bela datai maya nya Sekretari Perintah Sarawak Datuk Amar Mohamad Abu Bakar Marzuki, Direktor Opis Wilayah Sarawak Opis Menteri Luar Nengeri Malaysia Dato Fenny Nuli, Kaunselor Politik Singapura Charlene Chan enggau Sekretari Politik Valerie Lim.-EDISI UKAS
