KUCHING: AirBorneo diperambu nyadi kompeni penerebai bilun Lumba SEA 2027, lebih agi dikena nyaup program ke diatur di Sarawak.
Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, langgur nya udah dipadah ba aum perambu pun pengawa ngatur pengerami lumba nya serimbai pengerami muka Lumba SEA 2027 disadang diatur di Sarawak.
Nitih ku iya, taja AirBorneo baru ngepun pengawa lebuh randau nya diatur, Perintah Nengeri ngarap abis nadai siti bilun enggi kompeni penerebai bilun nya udah sedia bulan September tu ila.
“Taja bedau ditaga ungkup penerebai komersial, bilun nya ulih dikena nyadi ‘charter flight’ ke mai nama AirBorneo ungkup tuju rasmi pengerami nya,” ku iya.
Iya madah munyi nya ba aum media pengudah nerima penemuai basa ari pengatur AirBorneo ti betuai ke Tuai Pegawai Eksekutif iya, Megat Ardian Wira Mohd Aminuddin, ditu, Hari Satu.
Nambah ke jaku iya, iya ti mega Menteri Dagang Temuai, Industri Kreatif enggau Seni Pemerindang Sarawak nya madah, juluk ati nya seriris enggau perambu perintah nengeri ke deka ngerembai atur pengawa AirBorneo ari Rural Air Services (RAS) ngagai penerebai domestik enggau serantau, nyengkaum ngagai Semenanjung Malaysia sereta Asia Tenggara.
Dato Sri Abdul Karim bela madah, abis nadai juluk ati tiga bilun diulih ungkup timpuh setaun deka datai, bepanggai enggau bilun ke tau dibeli tauka di sua ba industri penerebai bilun global ke diatu napi penanggul bekal.-EDISI UKAS
