SARATOK: Projek Jematan Sungai Krian ti sebagi ari pemansang Jalai Tebing Tasik Sarawak disadang tembu lalu ulih ditengah mensia mayuh bulan Mac tu.
Sapit Premier Sarawak ti mega Menteri Infrastruktur enggau Pemansang Penyangkai Kapal, Datuk Amar Douglas Uggah Embas madah, projek beungkus urung RM112.5 juta nyadi jematan kesemilan ti dipelaba tembu taun tu.
“Pengawa ngaga jematan nya mandang pengeransing Perintah Sarawak negap kaul rentayan menua pesisir, lebih agi ba kandang tebing tasik.
“Jematan Sungai Krian 1.2 kilometer pemanjai nyengkaum rentayan jalai nyambung Pelilih Pusa enggau Pelilih Kabong, lalu ngemuntang pejalai peranak menua besehari-sehari sereta ngeranchak aktiviti ekonomi menua,” ku iya.
Iya madah munyi nya maya bejadika projek nangkir struktur Jematan Sungai Krian ditu, Hari Dua.
Datuk Amar Douglas mega madah, perengkaguna infrastruktur ti manah agi ukai semina nyungkak aksesibiliti, tang ngerandang mayuh agi peluang pemansang sosioekonomi ngagai peranak menua pesisir.
Pengawa bejadi nya bela digulu Sapit Menteri Infrastruktur enggau Pemansang Penyangkai Kapal Sarawak Datuk Ir. Aidel Lariwoo, Kaban Kunsil Nengeri (ADUN) Beting Mato Dato Razaili Gapor, ADUN Kalaka Mohamad Duri, ADUN Krian Friday Belik, Sekretari Mendam Opis Menteri Infrastruktur enggau Pemansang Penyangkai Kapal Sarawak Datu Chiew Chee Yau, Direktor Opis Kereja Raya (JKR) Sarawak Datu Ir Dr Cassidy Morris sereta raban tuai genturung pendiau ari Pelilih Pusa, Kabong enggau Saratok.-EDISI UKAS
