MERADONG: Semua projek Program Transformasyen Menua Pesisir (RTP) di sitak Meradong deka terus dipatau belebuh nentuka pejalai pengawa mujur digaga sereta meri pemaik ngagai rayat, lebih agi sektor pelajar.

Kaban Kunsil Nengeri (ADUN) Meradong, Datuk Ding Kuong Hiing madah, institusyen pelajar patut dikemerat nengah program pemansang mit baka RTP nentuka palan belajar ti likun enggau lantang agi ungkup raban nembiak.

“Pengawa matau deka nentuka projek RTP ukai semina tembu nitih taga, tang mega meri pemaik nyengala ngagai raban sekula enggau komuniti,” ku iya.

Iya madah munyi nya maya ngabas taba Projek RTP mungkur pengawa nyambung tali karan baru begunan Sekula Primari Bansa (China) Yong Cheng, ditu, Hari Satu.

Tuju pengawa ngabas nya dikena nisih ungkup guna teknikal sereta skop pejalai projek ti dilanggur enggau ungkus RM50,000, dikena nukar sistem tali karan lama ba kelas sekula nya.

Datuk Ding mega madah, projek tu sebagi ari inisiatif pemansang nengah belanja RTP Meradong ti meri pemaik terus ngagai pengelantang raban sekula enggau komuniti menua.

Pejalai pengawa nya nyengkaum pengawa nyambung tali katanbaru, lampu enggau kipas ngambi perengkaguna pemun karan ba tikas manah, likun sereta nitih spesifikasyen teknikal diatu.

Kelimpah ari nya, raban sekula nimbal manah pejalai projek tu laban nya ulih ngemanah infrastruktur sekula sereta mantu mutar isu nyeleti fasiliti ti majak nambah.

Sama datai, pengari Residen Sarikei, Sing Ming Shyang, pengari Opis Pelilih Meradong, Ting Kai Siang, sereta Penulung Injinir JKR Sarikei, Harith ti nyadi agensi pengatur projek. - EDISI UKAS