KUCHING: Pengawa nambah bantu nengah inisiatif Bantu Barang Diguna Sarawak (SKAS) ungkup taun 2026 terus nerima timbal positif ari rayat Sarawak ti madah ke nya sebagi ari pengeran perintah nengeri nyaga pengelantang rayat, lebih agi maya betapika belanja idup ti majak niki.
Penerima SKAS kategori ruang bilik, Fadillah Sulaiman, 34, madah, pengawa nampung sereta nambah penyampau bantu nya endang mayuh mantu ngatur belanja ninting hari sida sebilik.
Ku iya, bantu SKAS ukai semina inisiatif, tang meri pemaik ngagai rayat bepelasarka peneleba ngena belanja nya sebedau tu.
“Bantu SKAS tu endang sigi mantu rayat Sarawak. Taun dulu mayuh bulih bantu nya sereta aku empu entara penerima mega.
“Lebuh dipadah bantu tu deka ditampung lalu penyampau ditambah ungkup 2026, nya nyengala mandang perintah ransing mantu rayat, lebih agi lebuh ungkus belanja majak niki,” ku iya lebuh dirandau UKAS, Hari Dua.
Iya mega madah, bantu nya abis nadai ulih ngelempung tating meli barang pemakai sereta nentuka perengkaguna dapur seruran chukup.
Kelimpah ari nya, penerima SKAS kategori bujang, Islindawati Dolhardi, 28, madah kepengawa nambah bantu nya ngelantang ke ati, lebih agi maya napi ungkus belanja ti majak mar maya tu.
“Pengawa nambah SKAS ti dipadah ke Premier Sarawak sebedau tu meri pengelantang ngagai aku enggau kami sebilik lebih agi ari sukut belanja besehari-sehari,” ku iya.
Penemu nya mega disukung siku da penerima kategori bujang, Muhd Nurhaziq, 29, madah ke bantu ti nambah ari RM250 ngagai RM300 engkeman dikena mantu orabg bujang kurang penatai pemisi.
“Bantu tu beguna amat, lebih agi ungkup sida ke begaji mit. Taja penyampau enda besai, tang bantu tu besai amat reti laban ulih dikena meli barang diguna,” ku iya.
Bantu SKAS 2026 ti ditambah mandang penyiru Perintah Sarawak nentuka pengelantang rayat terus dijaga, seriris enggau pengeran ngelempung tating belanja rayat maya napi pemar ekonomi kemaya hari tu.- EDISI UKAS
