KUCHING: SMD Semiconductor nurai siti pemujur ba pemansang penau Sarawak lebuh ngatur Program Token of Completion ungkup kohort keterubah Program SMD Semiconductor–CENTEXS Digital IC Design Semiconductor Mastery ba Akademi SMD kena 23 Januari 2026.

Program nya siti ari inisiatif pun taun tu ti berati ke pemansang penau, kerejasama antarabansa enggau kaul ekosistem, lalu negap tanggungpengawa SMD nyadi pelasar nengeri ba nempa pengulih industri semikonduktor.

Program nya ngaku penyereta ti nyulut nembuka latih ba bidang ngaga tukuh IC digital.

Program deka dipenyadi Menteri Pelajar, Inovasye enggau Pemansang Penau (MEITD) Sarawak, Dato Sri Roland Sagah Wee Inn.

Kena 4 Februari 2026, SMD Semiconductor begulai enggau deligit Universiti Bristol, United Kingdom deka ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Tuju penemuai basa nya dikena meri penerang bekaul langgur kerejasama ba bidang semikonduktor kompaun sereta mandangka pengawa besilih dokumen Sempekat Pemereti Ati (MoU) entara SMD Semiconductor, Universiti Bristol, UK enggau Yayasan Sarawak.

Kerejasama nya deka ditandu nengah Program Kaul Universiti Bristol begulai enggau institusyen pelajar tinggi, institusyen teknikal enggau agensi perintah ti diatur SMD kena 5 Februari 2026 tu.

SMD Semiconductor mega deka ngulu Asia Pacific Aerospace Conference and Exhibition (APACE) 2026 ti diatur ari 27 ngagai 29 Januari 2026 di Palan Konvensyen Borneo Kuching (BCCK), ke alai Tuai Pegawai Eksekutifnya, Shariman Jamil deka ngulu nyadi pengelicha plenari enggau panel.

Kelimpah ari nya, SMD Semiconductor bela ngambi bagi ba program Sarawak di Mobile World Congress (MWC) Barcelona 2026 ari 2 ngagai 5 Mac 2026 di Fira Gran Via, Barcelona, Sepanyol dikena ngenegap rentayan antarabansa enggau ngangkat Sarawak ba mata global ba bidang teknologi maju.-EDISI UKAS