'Cascading Power Source’ Negap Agenda Kuasa Ulih Dikena Baru Sarawak
LAWAS: Pemansang Loji Hidroelektrik Mini Kota 2 enggau Loji Mini Hidro Kota 1 mandangka penau Sarawak ngena semua pemansut kuasa ulih dikena baru nengah konsep pemansut kuasa beringkat tauka 'cascading power source' lalu nyukung agenda pemansang kuasa meruan nengeri tu.
Mandal Presiden (Hidro), Sarawak Energy, Jonny Wong madah, konsep pemansut kuasa beringkat tu nyadi entara pugu agenda kuasa ulih dikena baru Sarawak, seriris enggau aspirasyen perintah nengeri ngemansangka sistem kuasa ti meruan, tan enggau manah ke rampa menua.
Ku iya, manggai taun 2035, mayuh agi projek baka nya dilanggur dikena nyamin bekal kuasa karan tegap enggau enda kelalu bepanggai ba bahan api baka diesel tauka bahan api thermal.
"Ba Loji Hidroelektrik Mini Kota 2 enggau Loji Mini Hidro Kota 1, kededua projek bebida tang bejalaika operasyen chara beringkat (cascading).
“Utai ti nyadi iya nya pemansut ai dikena ba Loji Hidroelektrik Mini Kota 2 deka dikena baru ba Loji Mini Hidro Kota 1.
“Tu mih dikumbai konsep pemansut kuasa beringkat lalu tu nyadi siti chunto ti chukup manah,” ku iya.
Iya nyebut pekara nya lebuh dirandau media ba program Media Familiarisation Trip di Loji Hidroelektrik Mini Kota 2 ditu, Hari Lima.
Berebak enggau nya, Jonny madah, chara nya meri empas minimum ngagai rampa menua laban enda begunaka pengawa ngaga tekat ai besai lalu semina ngena sungai anyut baka selama.
“Ari sukut operasyen, ba timpuh panjai ungkus murah agi dibanding mansutka kuasa ngena bahan api baka diesel tauka bahan api thermal,” terang iya.
Iya nyemetak madah, kuasa hidro terus nyadi entara pugu pemansang Perintah Sarawak nentuka 60 peratus kuasa dipegulai nengeri datai ari pemansut ulih dikena baru.-EDISI UKAS
