RM231 Juta Ngadu Rentayan Jalai Durin-Salim Jalai Besai Pan Borneo
SIBU: Opis Menteri Kereja Raya (KKR) ngagihka RM231 juta taun tu dikena ngaduka pengawa nyeruri semua rentayan jalai Durin-Salim di Jalai Besai Pan Borneo, semak Sibu Jaya.
Menteri KKR, Dato Sri Alexander Nanta Linggi madah, agih belanja nya diungkupka pengawa ngadu baru belakin jalai sereta nyeruri rentayan jalai nya ti diripot belingguk enggau ngeruga pengelikun penguna.
Ku iya, pengawa nya dipejalai berindik ari sebana mensia mayuh senentang gaya jalai ba KM28 jalai besai nya ti tau ngeruga pengelikun penguna ketegal bisi tekerap.
“Aku empu enggau raban Pan Borneo Sarawak sereta pegawai Opis Menteri Kereja Raya udah ngabas jalai nya sebedau berati gaya kebendar jalai nya.
“Pejalai kami tu beguna endar ngambi ulih meda, kelebih agi jalai ti belingguk sereta pengawa ti patut diadu,” ku iya ba siti penerang media, Hari Lima.
Iya nerang, chara nya dipejalai nentuka penanggul ulih diputar manah sereta mutar isu struktur jalai enggau nemban.
“Kereja ngintu dulu deka majak dipejalai belama nentuka tikas pengelikun lalu jalai ulih ditengah belama nyentuk projek nyeruri berengkah dipejalai,” ku iya.
Dato Sri Alexander nyemetak ke opis menteri sida naka ulih ngerumban inisiatif nya lalu deka matau rat pejalai projek ungkup pengelikun enggau pengelantang penguna.-EDISI UKAS
