Program Indu Dinamik & PERANTIS Ngangkat Indu Menua
KUCHING: Program Indu Dinamik enggau ‘Program Perantisan Kepimpinan Wanita’ (PERANTIS) udah mandangka pemujur ngangkatka indu pegari nama ba menua tu.
Menteri Pemansang Indu, Ruang Bilik enggau Komuniti Dato Sri Nancy Shukri madah, kenyau ditumbuh ba taun 2021, program Indu Dinamik udah mantu 21,274 indu ke alai ari penyampau tu, bisi 8,000 indu ari Sarawak nerima pemaik.
“Tetiap penyereta diberi geran RM500 siku ungkup dagang mit lalu ungkup Sarawak aja, semak RM4 juta diungkupka nyaup peluang dagang sida,” ku iya.
Iya madah munyi nya maya bejaku ba program Ngintu Hari Indu Antarabansa 2026 Zon Borneo ti dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ditu, Hari Tiga.
Kelimpah ari nya, ungkup program PERANTIS, iya madah, bisi 100 indu udah dipilih di selampur menua lalu 11 ari nya ari Sarawak.
"Inisiatif tu udah meri pemaik ngagai 4,122 penyereta nyengkaum 644 ari Zon Borneo,” ku iya baru.
Ngenang isu pengerai indu, Dato Sri Nancy ke mega Menteri Pengatur Pengawa Ngintu Hari Indu Antarabansa 2026 Zon Borneo bela nerang, Kaunsil Peranak Menua enggau Pemansang Ruang Bilik Menua (LPPK) ba taun tu netap juluk 32,000 indu beperesa penyakit riman pun serangan anak nengah HPV DNA ngambi ulih ditemu tumu.
Ku iya, Kampung Santubong di Sarawak udah dipilih nyadi palan pemungkal lalu lebih 53,000 indu Sarawak udah diperesa kandang berapa taun udah nengah program tu.
Sama datai, Sapit Premier Sarawak Datuk Amar Profesor Dr Sim Kui Hian, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nasar, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, raban Sapit Menteri sereta temuai dipebasa ke bukai. -EDISI UKAS
