KELANTAN: Perintah Sarawak nengah Biro Pelajar Islam Sarawak nyua pemeri RM1 juta dikena ngaga buding nembiak lelaki Institut Dakwah Islamiah PERKIM (IDIP).

Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, belanja nya dikena nyaup nyendia infrastruktur ke manah agi ngagai institut ti bepalan di Kelantan.

"Kitai bisi buding ti manah alai nembiak indu lalu kitai deka ngaga buding ti baru sereta likun ungkup nembiak lelaki.

"Ungkup tu kitai deka ngaga baru buding tu nengah PERKIM Kelantan lalu Biro Pelajar Islam Sarawak meri RM1 juta," ku iya.

Iya madah munyi nya ba aum media pengudah Prorgam Nyua Setipikit Ke-29 IDIP di Dewan Kompleks Islam Jubli Perak (KIJP), Sultan Ismail Petra, Panji, ditu, Hari Empat.

Iya ti mega Yang Dipertua PERKIM Nasional madah, pelajar nyadi pugu ngemansang ummah, lebih agi ngadaka rebak bepenemu ngena chara Islam ti universal.

"Kereja dakwah tu voluntia, semangat voluntia tu beguna dikena kitai ngemansangka rayat lebih agi ke Islam. Lalu tu universal enggau chara kitai meseti universal. Besai agi reti iya nya ngemansangka pendiau Islam ngambi runding mega universal,” ku iya.

Kelimpah ari nya, Premier Sarawak mega ngungkupka pemeri s RM20,000 ngagai PERKIM Kelantan.

Sama datai, Sapit Menteri Besai Kelantan Dato' Dr. Mohamed Fadzli Dato' Hassan, Tengku Puan Temenggong Kelantan ti mega Mandal Yang Dipertua PERKIM Nasional, Yang Mulia Tunku Puan Sri Dato' Hajah Noor Hayati Tunku Abdul Rahman Putra Al-Haj, enggau Sapit Menteri Kuasa enggau Pemeruan Rampa Menua Sarawak Datuk Dr. Hazland Abang Hipni, Sekretari Besai Dipebasa PERKIM Nasional Dato Dr Mohamad Marzuki Mohamad Omar sereta ke bukai. - EDISI UKAS