KUCHING: Pemansang modal mensia landik nyadi pugu ngamatka industri aeroangkasa di Sarawak, nengah pengawa berati tumu ba pelajar, latih pengelandik enggau penau lokal nengah chara ti komprehensif.
Menteri Pelajar, Inovasyen enggau Pemansang Penau Dato Sri Roland Sagah Wee Inn madah, Sarawak enda ulih nyingkang ke industri aeroangkasa enti enda dulu besikap pengereja pengawa ti ngembuan pengelandik teknikal sereta pengelandik praktikal nipak peminta industri.
Ku iya, pelajar akademik aja enda chukup enti enda disaup latih praktikal, ‘upskilling’ enggau ‘reskilling’ dikena ngadaka pengereja pengawa ti sedia tama ngagai industri.
“Kitai meseti ngepun enggau pelajar dulu. Kitai enda ulih bejaku bekaul ngemansangka industri tu enti nadai pakar sereta penau ti chukup,” ku iya.
Iya madah, institusyen latih teknikal enggau pengelandik bisi tanggungpengawa besai ngadaka juruteknik sereta pengereja pengawa bukai ti bepengelandik tinggi, baka ke dikemeran menua mansang ti ngasuh graduet sida patut nengah latih pengelandik sebedau diambi gawa ba industri.
Nerang bekaul pemansang kemaya hari, Dato Sri Roland Sagah Wee Inn madah, sekeda institusyen pelajar di Sarawak udah belabuh nyendiaka program bekaul aeroangkasa, nyengkaum nempa graduet ba bidang gintu, nyaga enggau miki bilun (MRO) ti disadang berengkah pun Februari tu.
“Ungkup i-CATS aja, bisi 28 nembiak diatu ngambi pelajar injiniring aeroangkasa lalu semua nya dipelaba urung 5,000 nembiak benung belajar ba bidang bekaul baka sains, injiniring, pekara wang enggau akaun ba macham institusyen,” ku iya nerang.
Iya mega andal pengawa berati ke pemansang modal mensia tu deka nyadi pengentap nempa pemansang industri aeroangkasa Sarawak nengah chara ti meruan, lalu nentuka pejalai nengeri tu betul dikena nyapai juluk pemansang manggai taun 2036. - EDISI UKAS
