MIRI: Bala nembiak di menua ulu Baram diperansang bela nyulut ba lumba enggau akademik dikena ngulihka pengidup menyana agi enggau ulih besemekih dudi hari.

Kaban Kunsil Nengeri (ADUN) Telang Usan, Dato Dennis Ngau madah, nembiak regas ba lumba uki semina ulih nempa tubuh ti kering, tang narak disiplin, fokus sereta liat ati ba pengidup enggau pelajar.

“Midul enggau pemujur ba padang nadai reti enti kita enda pintar runding. Bala anak meseti bagas belajar taja napi mayuh pemar,” ku iya lebuh bejadi Pekit Olahraga Kaunsil Sekula Primari (MSSR) Ke-39 Zon Baram Tengah 2026 di Sekula Primari (SK) Long Miri, Baram Tengah, Hari Tiga.

Iya mega ngelalau bala nembiak seruran temegah nyadi anak Baram taja asal ari menua ulu ti mayuh pemar.

Ku iya, pemar baka menua jauh ke sekula sekali ke ngena perau taika bedarat ukai pengelemi, tang ngasuh kitai liat ati sereta puh.

“Pemar tu ulih nyadi pun pemujur enti sema dikena ngasingka ati enggau disiplin diri. Anang ngasai ke diri baruh tauka ngumbai enda ulih mujur semina ketegal datai ari menua ulu,” ku iya.

Nya alai iya ngarap mayuh agi anak Baram nyadi raban profesional baka lutur, pengajar enggau bala tuai dudi hari.

Bisi 13 sekula ari Baram Tengah ngambi bagi ba pekit lumba ninting taun nya dikena milih atlit ti deka ngari ke zon nya ngagai pekit MSSR renggat nangkan nya di Marudi belabuh 20 April tu.

Pekit nya ukai semina kelang ngiga penau ba lumba ari bala nembiak aja, tang negap pemansang modal mensia sereta narak semangat penyerakup ba komuniti menua pesisir.-EDISI UKAS