i-STEEX 2026 Nempa Rebak Inovator Sarawak Tikas Global
KOTA SAMARAHAN: Pemansang Penau ba bidang Sains, Teknologi, Injiniring enggau Matematik (STEM) deka majak nyadi agenda besai Perintah Sarawak nempa rebak landik, setipak enggau juluk Strategi Pemansang Pengudah COVID-19 (PCDS) 2030.
Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, pengawa nya ditegap nengah bemacham inisiatif nyengkaum ngatur program baka International Science, Technology and Engineering Expo 2026 (i-STEEX 2026) ti nyadi pelasar beguna ngiga penau inovasyen bala nembiak.
Ku iya, program baka nya mandangka Universiti Malaysia Sarawak (UNIMAS) keran nyukung pemansang pelajar STEM sereta mekuh inovasyen kenyau ari renggat sekula.
“Program baka tu seriris enggau agenda Perintah Sarawak nempa rebak ukai semina bisi penemu, tang ulih ngemudi ubah ti manah agi,” ku iya ba Pengerami Nutup enggau Nyua Perais i-STEEX 2026 di DeTAR PUTRA kena Hari Empat.
Iya nyemetak madah, nguasa pengelandik baka runding analitikal, kreativiti, inovasyen sereta literasi teknologi beguna endar dikena nyikap rebak biak napi sektor ekonomi dudi hari nyengkaum teknologi digital, artificial intelligence (AI), kuasa ulih dikena baru enggau kilang maju.
Iya mega madah ke pemesai guna nguasa Jaku Inggeris kelebih agi ba subjek STEM, nipak pejalai polisi ngena jaku nya ngajar Sains enggau Matematik di Sarawak.
“Manggai 2027 nyentuk 2029, mayuh agi subjek sains tulin deka diajar ngena Jaku Inggeris. Nya alai, bala nembiak meseti sedia nguasa jaku tu ngambi ulih besemekih,” terang iya.
Ngenang silik, iya madah ke opis menteri sida ngena chara proaktif ba pemansang penau ti badu agi nganti penau datai kediri, tang ditempa enggau diembing kenyau ari terubah besekula.
Pengawa nya mega disukung nengah pelasar baka WorldSkills Malaysia enggau WorldSkills International sereta kerejasama rat enggau raban industri nentuka nembiak bisi pengelandik ti relevan enggau nangkup peminta makit kereja.
“Ba tetiap nembiak ti mujur, bisi pengajar ti ransing ati. Pengajar ukai semina meri penemu, tang nempa chara berunding enggau pengandal ba rebak dudi,” ku iya.
Iya mega meransang bala nembiak berani nguji, enda nangi ke diri puntan maya belajar, sereta terus ngerembaika penemu dikena ngulihka pemujur ba tikas tinggi agi nyengkaum antarabansa.
Program i-STEEX 2026 ti ngempuru bala nembiak ari selampur Sarawak nya diperati nyadi nalan ngempung sekula, palan pelajar tinggi, agensi perintah enggau industri dikena nempa ekosistem pelajar STEM ti holistik.
Inisiatif nya dikeandal ulih nempa mayuh agi inovator biak lalu negapka penuduk Sarawak nyadi hab pemansang penau enggau teknologi di rantau Borneo.-EDISI UKAS
