SPAOH: Tuai genturung pendiau patut anang takut ngerara kontraktor ti puntan nitih spesifikasi projek Program Transformasyen Menua Pesisir (RTP) dikena nyeliah projek tejanggal.

Sapit Premier Sarawak, Datuk Amar Douglas Uggah Embas nyemetak madah, tetiap projek patut digaga nitih prosedur sereta perambu nentuka projek lanchar enggau meri empas ngagai rayat.

Ku iya, kontraktor ti dipadu gawa enda tau enda nitih spesifikasi ditetapka, kelimpah nentuka kualiti kereja.

Nya alai iya ngansak Komiti Pemansang enggau Pengelikun Genturung Pendiau (JKKK) sereta tuai genturung pendiau regas matau pejalai projek ba renggat baruh.

Iya nyemetak madah, pengawa matau belama beguna endar nentuka tetiap agih belanja diberi ulih dikena manah komuniti.

Iya nyebut jaku nya ba Pengawa Nyua RTP 2026 DUN Bukit Saban di Opis Pelilih Mit Spaoh, Hari Empat.

Ba program nya, bisi 32 projek RTP taun 2026 ngaul agih RM5 juta udah disua ngagai 32 penerima datai ari Tuai Raban Bansa enggau Tuai Komuniti (KMKK) di sitak DUN Bukit Saban.

Kelimpah ari nya, sekeda inisiatif pemansang bela dilanggur nyengkaum projek ngemanah Klinik Pengerai Spaoh beungkus RM35 juta, operasyen Giatmara Spaoh bulan Julai sereta pemansang genturung betanam betupi di Tanjung Sebekut ti dikeandal nyungkak ekonomi dia.-EDISI UKAS