MIRI: Inisiatif Projek Pemansang Mit Menua Pesisir (MRP) dikena perintah nengeri nentuka bantu pemansang diberi nyerangkung semua nyentuk renggat baruh.
Sapit Menteri ba Opis Premier Sarawak (Pengereja Kasar, Imigresen enggau Patau Projek) Datuk Gerawat Gala madah, inisiatif nya nipak juluk perintah nentuka rayat menua pesisir enda tinggal ari pemansang.
“Agih belanja tu nentu projek pemansang mit baka nyeruri perengkaguna genturung pendiau, nyukung pengawa serakup enggau program ngintu pengelantang ulih diatur jampat sereta nemban.
“Taja mimit, tang meri empas besai ba pengawa nambah pengelantang sereta tikas idup peranak menua pesisir,” ku iya.
Iya nibar ke jaku nya ba pengawa nyua chek MRP Sitak Kunsil Nengeri (DUN) Mulu ditu, Hari Empat.
Kaban Kunsil Nengeri (ADUN) Mulu nyua agih belanja MRP penyampau RM605,000 ngagai 42 penerima diberi nengah Palan Servis ADUN Mulu.
Penerima ari mayuh Komiti Pemansang enggau Pengelikun Genturung Pendiau (JKKK), serakup enggau kelab lokal ba sitak DUN nya.
Iya mega ngarap ke semua penerima ngena manah bantu nya ungkup pemaik enggau pemansang komuniti sida, kelebih agi ba menua Mulu.- EDISI UKAS
