KUCHING: Sarawak nurai sejarah nyadi nengeri keterubah ba Malaysia ti numbuh sekula antarabansa enggi perintah nengeri seraya ngerembai akses pelajar tikas dunya enggau bisi kualiti ngagai anak ba nengeri tu.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, bisi lima sekula antarabansa udah ditumbuh nengah Yayasan Sarawak ke alai dua ari nya bela ba Petra Jaya enggau Batu 12, Kuching, diatu dibuka.

Ku iya, inisiatif nya nyeremin pengeran timpuh panjai perintah nengeri ngemansang modal mensia nengah pelajar bekualiti tinggi standard antarabansa, nadai ngira tirai juru sosioekonomi nembiak.

“Kebendar, kitai deka meri penemu ti chukup ngagai anak Sarawak ti bisi pengulih nadai ngira tirai juru enggau status sida sekali ke anak ari ruang bilik kurang penatai pemisi, jelan tauka ruang bilik ti pemisi.

“Laban ba aku, enti deka ngemansang komuniti kitai ti bisi standard antarabansa, sida meseti bisi penemu pemadu baru nipak tikas dunya ti nyadi pugu kita ngemansang nengeri tu,” ku iya.

Iya madah munyi nya lebuh bejaku ba Pengawa Bejadi Sekula Sekondari Antarabansa Yayasan Sarawak (YSISS) ditu kena Hari Enam.

Premier Sarawak mega madah, pengawa milih silibus nitih silibus Cambridge ba sekula antarabansa tu ngambi meri peneleba ngagai nembiak enggau standard antarabansa kelimpah meri awak ngagai sida besemekih ba renggat global.

Taja pia, ku iya, kelimpah ngena silibus Cambridge iya nya‘The International General Certificate of Secondary Education’ (IGCSE), sekula tu agi nitih ke polisi pelajar menua ti enda tau enda belajar subjek Jaku Melayu, Sejarah enggau Moral tauka Pendidikan Islam enggau napi peresa Sijil Pelajaran Malaysia (SPM).

Lebuh dipinta pemberita ngelansa status sekula antarabansa ba Miri enggau Bintulu, Datuk Patinggi Abang Zohari nerang ke status pemadu baru projek nya udah dipejalai seraya siti da agi diperambu.

“Diatu udah ba renggat digaga ke alai ungkup Bagi Menua Miri, sekula nya deka digaga ba sitak Bekenu ti udah belabuh digaga lalu tinda udah ditetapka lalu sama mega ungkup Bintulu.

“Kitai bisi lima sekula antarabansa ke alai siti da agi diperambu,” terang iya.

Sama datai, Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn, Sekretari Perintah Sarawak Datuk Amar Mohamad Abu Bakar Marzuki, Sekretari Pekara Wang Sarawak Dato Sri Dr Wan Lizozman Wan Omar, Sapit Menteri Pelajar, Inovasyen enggau Pemansang Penau Sarawak Datuk Dr Annuar Rapaee, Chairman Kaunsil Direktor Pelajar Antarabansa Yayasan Sarawak Sdn Bhd Datuk Amar Michael Manyin Jawong, Sekretari Besai Sarawak Dato Ahmad Nadzri Mohd Hassan, Direktor Yayasan Sarawak Datu Mohamad Junaidi Mohidin sereta temuai dipebasa bukai. - EDISI UKAS

Pemberita : Jonnie Kiew
Gambar : Hazrin Sunaini, George Embie & Shahril