SERIAN: Serakup Nasional Dayak Bidayuh (DBNA) Pampang Serian deka terus ransing ngatur penerang Projek Dokumentasyen Tanah Hak Adat Bansa Asal (NCR) ba sitak Parlimen Serian.

Penerang nya mega nentuka semua genturung pendiau Bidayuh ti bisi ati ulih ngena inisiatif nya sebedau haribulan kepenudi manggai taun 2030.

Kaban Kunsil Nengeri (ADUN) Bukit Semuja, John Ilus madah, nya sebagi ari inisiatif betampung meri penerang lenak agi bekaul hak ngempu sereta entara tanah adat ngagai peranak lokal.

Ku iya, program dokumentasyen tanah nya inisiatif DBNA ti udah diatur kenyau ari taun 2009 enggau nyerangkung palan pengentap raban bansa Bidayuh, belabuh ari Lundu nyentuk Serian.

“Inisiatif tu beguna amat ungkup komuniti Bidayuh laban tu nyaup ngelala hak tanah ti dikenuku. Tu mega ulih ngurangka penyarut bekaul entara tanah ti udah lama nyadi,” ku iya.

Ku iya, atur dokumentasyen tu ukai semina ngemuntang peranak mereti ke penuduk tanah sida tang meg nyadi chara tumu mutar isu tanah chara manah enggau nitih ke atur undang-undang.

Ba pengawa sebaka, John mega meri terima kasih ngagai Opis Tanah enggau Survei (JTS) laban bejalaika pengawa nyukat genturung asal ti benung dipejalai ba Kampung Koran Empaneg.

“Inisiatif JTS bejalaika pengawa nyukat tu chukup dikenang. Aku ngarap pengawa nyukat tanah endur betanam betupi udah tu deka ulih mutar semua isu entara tanah genturung enggau nerang ke hak ngempu individu baka ti dikearap peranak,” ku iya.

Iya mega ngelalau mayuh agi peranak genturung pendiau ngena peluang ngulu penerang ti diatur DBNA nentuka sida enda tinggal ba pengawa ngadu dokumentasyen sebedau timpuh abis ba taun 2030. - EDISI UKAS