OYA: Perintah Sarawak majak ransing nentuka pengelikun sereta pengelantang raban pelajar nangkan Menteri Pemansang Indu, Nembiak Mit enggau Pengelantang Komuniti Sarawak, Dato Sri Hajah Fatimah Abdullah bejadika projek nyapat sungai sereta kereja nyeruri gelanggang basketbol ba Sekula Primari Bansa China (C) Yak Tee, Oya.

Pengawa bejadi projek nya kena Hari Dua tu tadi mandangka penyiru perintah nengeri ba nyendiaka alai sekula ti lantang, likun sereta kondusif, lebih agi ba kandang bepenanggul tanah tusur.

Projek ngaga sapat sungai enggau kereja bukai ba Sungai Parit, ditu ngaul belanja sepenyampau RM500,000 nengah Program Transformasyen Menua Pesisir (RTP) Taun 2022 lalu udah digaga ari April nyentuk ngagai Disember 2024.

Kelimpah ari nya, perengka guna gelanggang basketbol sekula mega dikemanah nengah pejalai Projek Mit Menua Pesisir (MRP) berenggat, nyengkaum ngaga pagar ngelingi kelang beungkus RM12,000 (MRP 2021), pengawa ngechat baru tiang kelang sepenyampau RM8,000 (MRP 2024) sereta RM8,000 (MRP 2025) belanja tambah dikena nentuka perengka guna nya likun sereta manah.

Tembu program bejadi, Dato Sri Hajah Fatimah ngulu Pengerami Ngintu Taun Baru China 2026 ba Kelang SJK(C) Yak Tee ti diatur richah sereta mandangka pengelantang rayat pupu bansa ba Sarawak.

Ba jaku iya, iya madah pengerami ngintu Taun Baru China ukai semina signifikan ngagai komuniti Tionghua, tang nyadi kelai penyerakup enggau pengelantang rayat pupu bansa ba Sarawak ti semampai bebasa ke pangan diri sereta semangat segulai sejalai.

Iya mega madah, pengawa ngatur program baka tu meri awak ngagai rayat ngenegap kaul, nambah penemu budaya sereta nerenak semangat penyerakup ti tegap lebih agi ba raban rebak biak.

Sama datai, Pegawai Pelajar Pelilih Dalat, Magdaline Jon, Kepala Pengajar SJK(C) Yak Tee, Oya, Lo Leh Na, Chairperson Kaunsil Pengatur Sekula, Ong Sii Wei, Chairman JKKK Pasar Oya, Kapitan Ong Hock Hoon, Yang Dipertua PIBG, Muhamad Izwan Ismail sereta pengajar enggau raban sekula.-EDISI UKAS