KUCHING: Empat batang sektor iya nya kuasa ulih dikena baru, semikonduktor, pemansang modal mensia enggau aeroangkasa deka dikemerat Sarawak ba langkar kuing tuju pemansang ekonomi sepengudah 2030.

Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ba kandang lima taun ngelawa 2030 nyadi timpuh ti kritikal dikena nentu semua langgur ba Pelin Pemansang Udah COVID-19 (PCDS) 2030 ulih dipejalai enggau mujur.

"Diatu kitai benung berunding nama ke nyadi sepengudah 2030 laban 2030 semina lima taun agi lalu tu mih maya iya, lima taun, dikena kita bejalaika pengawa laban kitai bisi PCDS 2030 lalu diatu mega kitai meseti berunding nama ke deka digaga sepengudah 2030," ku iya madah.

Iya bejaku munyi nya maya Pengerami Bejadi Forum Dagang & Ekonomi ASEAN Sarawak (ASBEF) 2026 ditu, Hari Empat.

Nerang silik bekaul sektor nya, Datuk Patinggi Abang Zohari madah, ba sektor ulih dikena baru, Sarawak majak deka ngaga tekat ai, tekat ai melepu, biojisim, solar enggau hidrogen mimit karbon dikena nentuka bekal kuasa semampai bisi.

Ba sektor semikonduktor, ku iya, Sarawak deka ngemeratka pengawa ngaga chip enggau teknologi bepelasarka 'artificial intelligence' (AI) enggau tuju nempa Sarawak ukai semina penguna tang mega penengkebang inovasyen teknologi.

Kelimpah ari nya, Premier Sarawak madah, bekaul pemansang modal mensia, pekara nya deka dipejalai nengah pelajar tinggi enda bebayar ba universiti enggi Perintah Sarawak ke bisi 64 program bepelasarka sains nyengkaum undang-undang, pengawa berubat, pekara wang enggau psikologi ke dikena nyikap rebak baru napi penguji ekonomi baru.

"Ba sektor aeroangkasa, kitai deka chakah ngaga satelit enggau sistem nyimpan data ti beungkus efektif ke nyukung pemansang teknologi enggau ekonomi digital nengeri," pia ku iya.

Bela datai maya nya Menteri Industri Pemakai, Komoditi enggau Pemansang Kandang Menua Sarawak Dato Sri Dr. Stephen Rundi Utom, Sapit Menteri Kuasa enggau Pemeruan Rampa Menua Sarawak Datuk Dr. Hazland Abang Hipni, Chairman Kelab Ekonomi ASEAN enggau Presiden Institut Strategik KSI ungkup Asia Pasifik Tan Sri Michael Yeoh sereta Presiden Kelab Dagang ASEAN (ABC) ke mega Chairman Pemansik enggau Advokasi CARI ASEAN enggau Chairman Institut Pemansik Dagang Modal Malaysia (ICMR) Tan Sri Dr. Munir Majid.-EDISI UKAS

Pemberita: Nur Nabilla
Gambar: Ibanez Jeffery Guang