SIBU: Opis Betanam Betupi Sarawak terus ngesan pangku pengawa strategik nyadi penyambung entara polisi perintah enggau aspirasyen rayat negap komuniti tani sereta nyungkak transfomasyen sektor betanam betupi nengeri.

Direktor iya, Dominic Chunggat madah ke opis nya ukai semina bejalaika polisi ti dirintai perintah tang mega mending sereta mereti peminta orang bumai nengah mayuh program ngerembai, embing teknikal enggau sukung meruan.

Ku iya, komitmen opis nya mega diaku lebuh dirintai nyadi semilan finalis pemadu nyulut Anugerah Emas kategori Opis serimbai Hari Servis Perintah 2025 nengah Anugerah Kualiti Servis Perintah Sarawak (AKPANS).

“AKPANS nya ngaku pemujur ti berati ke tikas penyulut opis enggau agensi perintah ari sukut atur pengawa, operasyen sereta ngenatai servis bepelasarka chara pemadu manah,” ku iya.

Iya madah munyi nya ba Pengerami Makai Lemai Apresiasyen Opis Betanam Betupi Sarawak Taun 2026 kena Hari Lima ti digulu urung 350 temuai.

Ba pengerami nya, bisi 168 staf opis nerima Anugerah Servis Nyulut (APC) kelai ngenang pengeransing gawa sepanjai taun nyin tadi.

Ba pekara sama, iya madah ke pengawa ngatur Agrofest begulai enggau bakih strategik mujur ngerikod asil RM2.39 juta enggau penatai 40,331 pengusung nengah roadshow ba Limbang, Pakan, Serian, Spaoh enggau Subis lalu kepenudi ba Bintulu.

Sarawak Agrofest di Bintulu mega ngerikod asil RM6.44 juta sereta matak 811,544 pengusung seraya nunjukka pengulih besai sektor agropemakai nengeri.

“Program baka tu ukai semina ngelaku produk lokal, tang mega nyaup nambah penatai pemisi sereta penemu komuniti tani ba selampur Sarawak,” ku iya.

Iya mega minta semua staf opis terus komited nyungkak transfomasyen sektor betanam betupi nuju pemansang meruan enggau bepelasarka teknologi, seraris enggau pengawa nyamin bekal pemakai sereta ngangkatka Sarawak nyadi pengeksport beresi pemakai manggai 2030.

Pengerami nya mega digulu Menteri Industri Pemakai, Komoditi enggau Pemansang Kandang Menua Sarawak, Stephen Rundi Utom; Sapit Menteri Industri Pemakai, Komoditi enggau Pemansang Kandang Menua Sarawak, Martin Ben; Direktor Opis Servis Veterinar Sarawak, Adrian Susin Ambud; sereta Menijar Besai Kaunsil Industri Getah Sarawak (SARIB), Make Jiwan.-EDISI UKAS