KUALA LUMPUR: Sarawak negap strategi matak temuai domestik nengah pengawa ngelanchar kimpin Sia Sitok Sarawak 2026 enggau nyendia diskaun nyentuk 40 peratus, lalu ngujungka nengeri tu nyadi palan ulih dilawa serimbai Taun Nemuai Ke Malaysia 2026.
Kimpin ti dipejalai Sarawak Tourism Board (STB) di Palan Dagang enggau Pemandang Antarabansa Malaysia (MITEC) kena Hari Enam nya dipeda nyadi inisiatif proaktif negap peminta dagang temuai domestik maya ubah chura pejalai global enggau geopolitik ti enda tegap diatu.
Chairman STB, Dato Dennis Ngau madah, temuai menua mengkang nyadi pugu nyungkak industri dagang temuai Sarawak ke alai kimpin tu ngerandang peluang nambah rentayan sereta matak mayuh agi pengusung ke nengeri tu.
Ku iya, lebih 80 pakej dagang temuai disedia enggau timpuh pejalai nyentuk 15 Disember 2026, lalu meri fleksibiliti ngagai temuai merambu pejalai sepanjai taun enggau rega ti mudah agi.
Kimpin nya ngaul kerejasama 17 pengempu dagang temuai bisi lisin Sarawak nyerangkung pakej minimum tiga hari dua malam nyengkaum endur diau, bejalai sereta itinerari.
Entara pematak ti dibantai nyengkaum Kuching nyadi palan pesaka enggau budaya, Sibu enggau peneleba Sungai Rajang enggau rumah panjai, sereta Miri ti nyadi pintu penama ngagai taba Pesaka Dunya UNESCO baka Taman Negara Gunung Mulu enggau Taman Negara Niah kelimpah penyelai tanah tinggi Bario.
Berebak enggau nya, kimpin tu mega ditegap nengah kalinda lebih 110 aktiviti dagang temuai sepanjai 2026 dikena nambah pematak nengeri tu.
Entara aktiviti besai iya nya Rainforest World Music Festival 2026 ti deka diatur ari 26 nyentuk 28 Jun di Kampung Budaya Sarawak, mandangka artis menua enggau antarabansa nengah gaya nyelai kampung ujan Borneo.
Sepanjai MATTA Fair, Pavilion Sarawak mega mandangka mayuh peneleba interaktif nyengkaum pemerindang muzik asal, demonstrasyen krafjari enggau aktiviti budaya dikena ngayanka penyelai produk dagang temuai nengeri. - EDISI UKAS
