MUKAH: Kerejasama rat entara alumni, Gerempung Apai Indai enggau Pengajar (PIBG) sereta raban sekula terus nyadi penyungkak nambah penyulut Sekula Sekondari (SMK) Three Rivers.

Kaban Kunsil Nengeri (ADUN) Tellian, Royston Valentine madah, kerejasama rat semua raban ulih nambah pemujur sekula ba bemacham bidang.

Ku iya, pemanah kaul nya mega nyengenda dipeda nengah Pengerami Aidilfitri ari Gerempung Alumni TRS ti richah diatur enggau penatai raban sekula, alumni sereta PIBG.

"Program tu ukai semina nyadi pelasar ngerapit kaul tang mega ngempuru ex-nembiak ngambi nyukung pemansang sekula,” ku iya ba program nya, kena Hari Enam.

Iya ti mega Pemungkal Gerempung Alumni TRS ngarap program baka nya ulih ditampung dudi hari.

Dikena nyukung aktiviti ninting taun sekula, iya mega nyua geran Projek Mit Pemansang Menua Pesisir (MRP) sepenyampau RM30,000 ngagai PIBG sekula nya.

Pia mega, sepenyampau RM10,000 diagih ngagai Gerempung Alumni TRS dikena ngemujur aktiviti alumni, seraya RM5,000 da diagih ngagai Raban Tanda enggau Main Asal Sekula nengah Gerempung Pelajar Mukah.

Royston ngarap agih belanja nya ulih dikena manah ke pemaik raban sekula.

Ba program nya, bisi mega diatur licha meri peransang ngena pejuluk ‘Pengidup Pengudah Sekula: Nempa Tunga Kuing enggau Pengidup Menyana’ ti dikenatai pengelicha, Amin Idris.

Sama datai, Prinsipal SMK Three Rivers Donny Dahlan, Chairman Gerempung Alumni TRS Simon Joseph Usau sereta Yang Dipertua PIBG SMK Three Rivers Mohammad Nazir Besiri. - EDISI UKAS