KUCHING: Sarawak diatu meseti ngalih ari semina nyadi penguna teknologi ngagai penengkebang teknologi ngambi pansut ari status ekonomi bepelasarka teknologi baruh.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa nya benung dipejalai nengah pemansang industri semikonduktor lokal nyengkaum nengkebang chip sebatian bepelasarka Gallium Nitride (GaN) ti dikuasa Artificial Intellegence (AI).

“Pemujur Sarawak naka diatu nengah kompeni Perintah Sarawak, SMD Semiconductor ngambi nengkebang chip sebatian bepelasarka Gallium Nitride enggau dikuasa AI tauka GaN chip nya mandang pengeran nyadi penengkebang chip dibanding semina nyadi pengelekat chip,” ku iya nengah pesan Taun Baru China 2026, kena Hari Minggu.

Taja pia, iya ngaku pejalai nuju penengkebang teknologi begunaka pengawa meranak puku besai ba pansik enggau pemansang (R&D), pakar sereta kerejasama strategik enggau institusyen lokal enggau antarabansa.

Pansik nya ngasilka chip ti dikena dalam peranti Keteq AI nentuka pengawa ngena kuasa karan ti efisyen agi.

Pia mega, iya madah ke SMD Semiconductor begulai enggau Yayasan Sarawak sereta University of Bristol mega nyain Sempekat Pemereti Ati (MoU) dikena negap kerejasama ba bidang pansik, pemansang teknologi enggau pemansang modal mensia.

Ba lansa sama, Sarawak mega merambu ngembuan satelit kediri empu nengah pemansang satelit mikro tauka CubeSat ungkup tuju ngemata gaya hari.

“Satelit bansa tu tauka CubeSats jauh murah agi dikemansang lalu diengkah ba orbit bumi ti baruh enti dibanding ungkus satelit konvensional lalu tu mega chara meransang inovasyen enggau nyendia peluang ngagai rebak biak nguasa teknologi aeroangkasa, siti bidang ti majak beguna ungkup ekonomi dudi hari,” ku iya baru. -EDISI UKAS