Inisiatif Pelajar Tinggi Sarawak Ngembing Pemansang Rebak Baru
SARIKEI: Inisiatif Perintah Sarawak melanja pelajar tinggi dipeda nyadi chara strategik ngemansangka modal mensia betikas tinggi sereta nyaup pengulih besemekih.
Sapit Menteri Pengatur Mengeri, Tanah enggau Rampa Menua Sarawak, Datuk Len Talif Salleh madah, bantu nya deka nentuka mayuh agi peranak Sarawak nampung pelajar ngagai renggat universiti enggau institusyen pelajar tinggi.
Ku iya, taja suah dipadah pelajar pechuma, tang kebendar iya ungkus belajar nya dipelanja perintah nengeri.
"Pelajar deka nempa rebak bepenemu sereta bepengelandik ke nyaup pemansang rayat sereta nengeri dudi hari," pia ku iya.
Iya bejaku munyi nya maya Pengerami Nutup Randau Komuniti 2026 ke diatur Unit Komunikasi Awam Sarawak (UKAS) Sitak Sarikei di Balai Mensia Mayuh Kampung Selalang, Hari Minggu tu tadi.
Datuk Len Talih mega madah, insiatif nya bela meri awak ngagai rebak baru ngulih kereja ti lebih agi manah dudi hari ila.
Ku iya, pengawa nyungkakka pelajar seririh enggau pengeransing perintah nengeri ke ukai semina ngemansang infrastruktur tang bela ngemansangka modal mensia.
Kaban Kunsil Nengeri (ADUN) Kuala Rajang nya bela ngelalau apai indai ngambika semampai nyungkung sereta ngembing anak sida nyentuk mujur nampung pelajar ngagai tikas ke tinggi agi. -EDISI UKAS
