SPAOH: Macham bengkah inisiatif ekonomi enggau pemansang menua pesisir majak disungkak dikena ngangkatka tikas pengidup rayat nyengkaum ba peranak rumah panjai di Spaoh.

Sapit Premier Sarawak Datuk Amar Douglas Uggah Embas madah, pekara tu bekaul pengawa betanam betupi sereta ngerandang pun penatai ekonomi baru nengah projek ke dilanggur enggau benung digaga di menua nya.

"Dalam kandang dua taun tu, lebih 50,000 iku anak manuk diberi ngagai peranak rumah panjai dikena kitai nyaup sida nambah penatai pemisi diri lalu asil nya deka dijual nengah randau begulai enggau Cold Storage.

"Kelimpah ari nya, siti Agropark lebih 700 ekar pemesai deka ditumbuh ngena teknologi betanam betupi moden lalu projek padang bilun sereta palan ngumpul enggau ngadu disadang ngemuntangka agi pengawa nyual asil ngagai menua bukai," ku iya madah.

Iya bejaku munyi nya maya Pengerami Makai Lemai Mantar Gawai Dayak 2026 ke diatur Gerempung Tuai Rumah (GTR) Pelilih Mit Spaoh ditu, Hari Minggu tu tadi.

Datuk Amar Douglas Uggah madah, kelimpah sektor ekonomi, sektor dagang temuai bela dikemeratka nengah langgur deka ngaga kubu Bujang Berani di Bukit Sadok.

Ku iya, tu deka nyadi pematak baru temuai seraya nyaup nengkebang pun penatai ekonomi rayat baka nyual kraf enggau program bekaul dagang temuai.

Awak nya bela dikena iya ke mega Kaban Kunsil Nengeri (ADUN) Bukit Saban madah pemesai reti tanggungpengawa Tuai Rumah ke nyadi jematan perintah enggau rayat.

Iya madah, sida megai tanggungpengawa nentu bantu perintah datai ba sida ke patut nerima.

Ba pengerami nya mega, Kaban Parlimen Betong Dato Dr. Richard Rapu madah, pemansang infrastruktur, sosioekonomi enggau pelajar ke diasai maya hari tu bepun ari penegap enggau pengelikun politik sereta sukung rayat ngagai perintah.

Iya bela ngena awak nya minta apai indai semampai nyukung pelajar anak lebih agi ba bidang Sains, Teknologi, Injiniring enggau Matematik (STEM) nyerumba peluang pelajar pechuma diberi Perintah Sarawak. -EDISI UKAS