SARIKEI: Unit Komunikasi Awam Sarawak (UKAS) ransing nyungkak tanggungpengawa diri nyadi jematan perintah enggau rayat ba pengawa ngenataika penerang ke amat bekaul inisiatif perintah nengeri.

Sapit Direktor UKAS, Mohamed Faizal Shah Ali madah, nengah Program Randau Komuniti, macham bengkah penerang bekaul polisi enggau bansa bantu perintah ulih dikenataika terus ngagai rayat.

Ku iya, tu meri awak ngagai rayat ngulih penerang ke lebih agi nyemetak seraya ngenegapka kaul perintah enggau komuniti.

"Tuju program tu iya nya deka nyintalka agi kaul perintah enggau rayat lalu nentuka penerang bekaul dikenataika enggau engkeman," ku iya maya program nya ke diatur ba Balai Mensia Mayuh Kampung Selalang ditu, Hari Minggu tu tadi.

Kelimpah ari nya, Mohamed Faizal madah, media rama nyadi media ke beguna dikena nyadung penerang nyengkaum bekaul program ke diatur bala pemesai sereta program perintah.

Tang iya ngarapka mensia mayuh semampai bejimat enggau penerang ke enda amat ti disadung nengah laman rama.

Ku iya, sida tau meresa pengamat penerang nya ba laman rasmi UKAS ngambika enda tepawah runding enggau penerang ti enda temu pengamat.

Iya mega madah, UKAS semampai ransing ngatur program baka nya di selampur Sarawak ngambika rayat semampai nemu nama bagi penerang ke amat lalu enda tinggal ari pemansang menua.

Bela datai maya nya Sapit Menteri Pengatur Mengeri, Tanah enggau Rampa Menua ke mega Kaban Kunsil Nengeri (ADUN) Kuala Rajang, Datuk Len Talif Salleh enggau Sapit Residen Sitak Sarikei, Badjuri Bidin.-EDISI UKAS