LUNDU: Begulai ngerami Taun Baru China terus richah lebuh Kaban Kunsil Nengeri (ADUN) Opar, Billy Sujang ngatur Program Ngabang Taun Baru China di Pelilih Lundu kena Hari Tiga.

Ba program nya, iya ngabang ngagai sekeda rumah Tuai Komuniti enggau Tuai Raban Bansa (KMKK) kelai ngenang jasa sida nyadi jematan entara perintah enggau rayat, kelimpah negap kaul tuai begulai enggau komuniti menua nya.

Entara genturung pendiau endur sida ngabang baka Kampung Bagak, Kampung Sekambal Cina, Kampung Perigi enggau Kampung Sedaing.

Penatai iya disambut gaga peranak dia ti ngena peluang nya berandau sereta bekunsi utai ti nyadi nyengkaum pemansang, pengelantang enggau peminta sida.

Ngena peluang nya, Billy mega meri Selamat Taun Baru China sereta ngarap ke pengerami taun tu mai pengaya, pengerai enggau pengelantang ngagai semua, kelebih agi ba sitak DUN Opar.-EDISI UKAS