SRI AMAN: Semangat Taun Baru China terus dirami enggau ati gaga lebuh Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis ngabang ke Pantu enggau Sri Aman serimbai Taun Baru China 2026.
Ba hari keterubah, iya ti mega Kaban Kunsil Nengeri (ADUN) Simanggang ngepun pejalai ngabang nyau jauh lemai ngagai rumah Phang Hoi Phin tauka tampak agi dikangau Manang Kupak di Rapak, Pantu.
Iya nampung pejalai ke rumah Penghulu Lee Thong Sen di Pasar Lachau, Pantu sebedau ngulu Pengerami Makai Lemai Taun Baru China ba rumah iya empu di Jalai Tini, Bandar Simanggang.
Datai ba hari kedua, iya enggau bala bukai ngulu Pengerami Nerima Pengabang Taun Baru China 2026 di rumah Kapitan Kiew Sii Ted di Lorong 1, Jalai Pasir, Pasar Simanggang.
Sida udah nya ngabang ngagai rumah Kapitan Kang Tai Hing, Penghulu Kang Tai Kong enggau Ling Yu Kong di Pasir Panas sebedau ke rumah Datuk Tan Chong Meng di Jalai Main Bazaar.
Iya mega bisi ngabang ngagai rumah Kaunselor Wong Yii Hong di Kampung Kejatau sebedau ngapuska pejalai sehari ba rumah Kapitan Chin Chong Miaw di Pasar Sabu.
Berebak enggau nya, iya madah ke pengerami Taun Baru China ukai semina ngerapit kaul diri sebilik aja, tang negut semangat segulai sejalai ba peranak pupu bansa di Sri Aman.
“Pengerami Taun Baru China ukai semina ngerapit kaul diri sebilik aja, tang mega negap semangat bebaik ba peranak pupu bansa di Sri Aman.
“Tradisyen ngabang baka tu mega lambang pengelantang ti diasai kitai lalu nyadi pugu pemansang komuniti,” ku iya.
Iya mega meransang rebak biak terus nyaga manah penyerakup enggau nyagu pengelain budaya ti nyadi pengering nengeri tu.–EDISI UKAS
