BELAGA: Pengerami Ladong Bio Lepa Ajau 2026 terus nyadi pelasar beguna negut penyerakup sereta nyaga pesaka budaya komuniti Kenyah ba Sungai Asap, Belaga.

Pengerami diatur Serakup Nasional Kenyah Sarawak (PKKS) Pampang Sungai Asap Belaga nya tembu di Balai Uma Kulit kena Hari Dua.

Kaban Parlimen Baram, Dato Anyie Ngau madah, komuniti Kenyah meseti terus negut penyerakup sereta ngetan semangat kerejasama ke pemansang begulai.

Ku iya, penyerakup nya entara juluk besai numbuh PKKS lalu nyadi pugu besai ngentapka penuduk sereta pemansang komuniti Kenyah ba nengeri tu.

“Nengah penyerakup enggau kerejasama ti tegap, kitai ulih nyapai pemansang enggau pemujur baka raban bansa bukai,” ku iya ba pengawa nangguh pengerami nya.

Pengerami ti udah datai ba edisyen ke-14 nya diatur begintir ari rumah panjai komuniti Kenyah di Pelilih Belaga enggau Uma Kulit Sungai Asap dipilih nyadi tuai rumah ngatur pengerami nya taun tu.

Sepanjai dua hari diatur, bemacham aktiviti udah diatur nyengkaum program meri peransang, bemain, pemerindang main asal sereta pekit seni budaya pesaka komuniti Kenyah.

Pengawa ngatur pengerami nya dikena mandangka meri terima kasih ke asil enggau jereki diulih sepanjai taun kelimpah nyadi pelasar nyagu seni budaya, adat asal enggau identiti etnik Orang Ulu kelebih agi komuniti Kenyah ngambi terus dijaga enggau ditampung rebak biak.

Pengerami nangguh nya richah enggau pemerindang main asal baka Muzik Asal Tebengang Lung Lebu’ Kulit, Tanda Penyerakup sereta pemerindang Jatun Julut kelimpah chabut tikit benasip.

Pengawa kepenudi malam nya nyengkaum Pekit Balan Nyanting enggau Bungan Lisu ti nerima timbal manah ari bala pengusung.

Nyadi simbolik nangguh pengawa, Dato Anyie begulai enggau temuai dipebasa udah ngiling tikai wi kelai bejadi nutup pengerami nya.

Sebedau pengerami tembu, Pemancha Tony Kulleh madah ke Uma Kelap, Sungai Asap nyadi tuai rumah Pengerami Ladong Bio Lepa Ajau edisyen ke-15 taun baru. - EDISI UKAS