BELAGA: Projek Sungai Asap ‘Digital Village’ (SADV) beungkus RM36 juta diatu benung chakah dipejalai dikena negap pemansang ekonomi digital menua pesisir kelebih agi ba Sungai Asap enggau Murum.

Kaban Kunsil Nengeri (ADUN) Murum, Kennedy Chukpai Ugon madah, projek nya nyengkaum nyendia internet deras ngena teknologi gentian optik beungkus RM36 juta dikena ngedut takah digital entara mengeri enggau menua pesisir.

“Aku ngarap projek tu lanchar lalu tembu nitih taga enggau nadai sebarang penanggul laban projek tu entara siti inisiatif besai ngedut takah digital entara mengeri enggau menua pesisir,” ku iya.

Iya madah munyi nya lebuh Pengawa Bejadi Ladong Bio Lepa Ajau 2026 Serakup Nasional Kenyah Sarawak (PKKS) Pampang Sungai Asap Belaga di Dewan Uma Kulit, kena Hari Dua.

Lebih beguna, ku iya, projek tu deka nyadi penyungkak pemansang ekonomi digital ba menua ulu.

Nipak pemansang Sungai Asap ‘Digital Village’ tersebut, Kennedy mega udah merambu numbuhka ‘Smart Agriculture Transformation Centre’ (SATC) ba Palan Pengentap Baru Bakun (BRS) Sungai Asap lebuh Aum Kunsil Nengeri Sarawak ti udah.

Ku iya, SATC ti dilanggur tu deka nyadi palan pemansang smart farming bepelasarka teknologi moden nyengkaum ngena Artificial Intelligence (AI), automasyen, Internet of Things (IoT), dron betanam betupi sereta bemacham teknologi betanam betupi pintar ke bukai.

Iya andal ke nengah pemisi pemansang baka tu, Sungai Asap enggau Murum ulih nyadi chunto pemansang menua pesisir moden ti progresif, besemekih enggau bepelasarka teknologi. - EDISI UKAS