BETONG: Projek Akademi Nembiak Betong pemesai 17 ikar ti deka dikemansang semak RTC Betong di Simpang Layar disadang nyadi hab pemansang pengelandik nembiak ba Bagi Menua Betong.

Sapit Menteri Nembiak, Lumba enggau Pemansang Orang Dagang Sarawak ti mega Kaban Kunsil Nengeri (ADUN) Layar, Datuk Gerald Rentap Jabu madah, akademi nya deka nyendia peluang enggau awak ngagai raban nembiak nyikap diri enggau bemacham pengelandik besai.

"Akademi Nembiak Betong deka nyendia peluang enggau awak ngagai raban nembiak nyikap diri enggau bemacham pengelandik baka kereja ba sektor minyak enggau gas, ngena dron profesional enggau ke bukai.

"Akademi tu deka digaga siti hostel ti ulih nangkup 160 nembiak, padang bol sintetik enggau mega trek belanda,” ku iya.

Iya madah munyi nya pengudah ngulu pengawa miring serimbai Mantar Nasih Tanah Perambu Projek Akademi Nembiak Betong, ditu kena Hari Tiga.

Iya madah, projek ngaga akademi nya dipejalai Opis Kereja Raya (JKR) Sarawak ngena agih belanja nengah Agensi Pemansang Bagi Menua Betong (BDDA) sepenyampau RM30 juta.
Datuk Gerald mega ngelalau peranak menua ngambi meri kerejasama enggau sukung ngagai raban pemaju sepanjai timpuh bejalaika projek ti disadang begunaka timpuh dua taun.

Iya ngarap projek nya ulih belabuh dipejalai enda lama da lalu tembu nitih taga ti ditetapka ngambi raban nembiak ba Betong ulih diasai ke pemaik sereta perengkaguna ti deka disedia. - EDISI UKAS