KUCHING: Pengawa ngemeran 3R iya nya‘Reuse, Reduce, Recycle’ di bazar Ramadan dipatau Dewan Bandaraya Kuching Utara (DBKU) nipak juluk Perintah Sarawak nyaga pemeruan rampa menua.

Tuai Sekretari Politik Premier Sarawak, Dato Fazzrudin Abdul Rahman, madah, Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg semampai ngemerat pekara nya.

“Premier Sarawak semampai ngemerat pekara bekaul pemeruan tu ukai semina ba sektor industri tang mega raban DBKU udah bejalaika 3R tu ungkup sektor pemakai enggau ai irup,” ku iya.

Iya madah munyi nya lebuh dirandau pemberita pengudah bejadi Bazar Ramadan Semarak, ditu kena Hari Lima.

Nitih ke penerang, teda nya ila deka dianjung ngagai palan kompos nengeri tu.

Ngenang pasal penanggul sekut ba bazar nya, iya ti mega Kaban Kunsil Nengeri (ADUN) Tupong madah ke sida udah berandau enggau DBKU ngiga entepan entukar baru.

“Aku berandau enggau DBKU ngambi ngelala taba ti besemak nyadi entepan entukar ngambi bala pengusung muntang ngelawa kedai,” ku iya.

Bazar Ramadan Semarak dibuka ari 19 Februari nyentuk 20 March 2026, belabuh ari pukul 2 nyentuk 7 lemai ninting hari.

Taun tu, bisi 40 pedaja ngambi bagi nyengkaum 30 pedaja Semarak Kiosk Gadung enggau 10 pedaja Palan Bedaja Semarak.

Sama datai, Datuk Bandar DBKU Dato Hilmy Othman enggau Direktor DBKU Ramzi Abdillah. -EDISI UKAS