LUBOK ANTU: Pengawa ngeranchak pemansang enggau komuniti lokal ba kandang menua pesisir majak dipejalai lebuh Perintah Sarawak ngemendar projek Program Transfomasyen Menua Pesisir (RTP) penyampau RM500,000 dikena ngaga Balai Komuniti China Lubok Antu ti baru, kena Hari Lima.

Pekara nya dipadah Sapit Menteri Dagang Antarabansa, Industri enggau Pengawa Meranak Puku Sarawak Datuk Dr Malcolm Mussen Lamoh lebuh ngabang ke Entugam, nyengkaum ngabang ngagai rumah Huang Tiong Sing sereta rumah Wong Hie Ing.

Ku iya, pengawa ngaga balai komuniti nya ukai semina nyendia fasiliti sosial ti lantang enggau likun agi tang mega ulih nyadi penyungkak aktiviti ekonomi lokal nengah pengawa ngatu program, pengerami komuniti enggau mayuh aktiviti ti ulih nambah penatai pemisi peranak.

“Kelimpah nyadi palan aktiviti sosial enggau main asal, balai tu ulih dikena ungkup program dagang, latih sereta aktiviti ti nyukung pemansang ekonomi komuniti,” terang iya.

Nambah ke nya, iya mega ngemendar agih belanja Projek Mit Pemansang Menua Pesisir (MRP) penyampau RM40,000 dikena negap pemansang komuniti di Entugam.

Ari penyampau nya, RM20,000 diagih ngagai Komiti Pemansang enggau Pengelikun Genturung Pendiau (JKKK) Entugam dikena bejalaika projek komuniti sereta nyeruri perengkaguna pemun ti ulih nyukung pengelantang enggau produktiviti peranak.

Pia mega, RM20,000 da diagih ngagai Lubok Antu Charitable Trust Fund dikena nyaup ngatur program ngintu pengelantang enggau komuniti, nyengkaum inisiatif ti ulih nyamin pengelantang sereta penumbuh ekonomi komuniti lokal.

Iya nyemetak madah ke pemansang menua pesisir meseti dikemansang chara strategik enggau inklusif nentuka komuniti ba menua ulu ulih ngasai pemansang sereta peluang ekonomi ti besai agi.

“Perintah Sarawak keran nentuka pemansang ti dipejalai ukai semina nambah perengkaguna pemun tang mega meri empas terus ngagai ekonomi tumbuh enggau ngubah tikas idup rayat,” ku iya.

Ku iya agi, pejalai ngabas nentuka perintah berati kediri pengulih enggau peminta komuniti seraya ngelanggur inisiatif pemansang ti beselinting enggau meri empas besai.

Pejalai ngabang nya mega nyadi pelasar mendingka sada peminta peranak bekaul peluang pemansang enggau ekonomi ti ulih diserungkai dia.

Sama datai, Pegawai Pelilih Lubok Antu Akoi Ejau, Sekretari Politik Menteri Besai II Malaysia Mikai Mandau, Sekretari Politik Premier Sarawak Roseline Neging, Kaban Kaunsil Direktor TEKUN Nasional Jampi Tutong, Pegawai Tadbir Khas Sapit Menteri MINTRED Jack Meredan, Pemancha Garang Juben, KMKK DUN Batang Ai sereta kaban MLDA. – EDISI UKAS