KUCHING: Komiti Gawai Dayak Renggat Sarawak 2026 udah ditumbuh dikena ngadu pengawa besikap tumu ngatur pengerami nya ke disadang berengkah Mei tu.
Pengawa numbuh komiti nya nangkan Aum Nyerah Pengawa Komiti Gawai Dayak Renggat Sarawak ti dibetuaika Sapit Premier Sarawak ke mega Chairman Komiti Besai Gawai Dayak Renggat Sarawak 2026, Datuk Amar Douglas Uggah Embas, Hari Dua.
Ba aum nya, Datuk Amar Douglas Uggah madah, aum nya diatur dikena nentuka semua perambu program dipejalai enggau berurun.
Ku iya, pengerami taun tu patut digaga nitih standard tinggi agi lalu bisi perambu silik, setipak enggau juluk ati Perintah Sarawak ke deka nempa Gawai Dayak nyadi batang program budaya nengeri ti ulih ngangkat pesaka sereta identiti rayat Dayak ngagai renggat jauh agi.
Iya mega meri terima kasih ngagai semua raban ke pengeransing sereta kerejasama nentuka pemujur ngatur pengerami taun sebedau tu.
Aum nya bela besetuju nyiri Sapit Menteri Pengerai Mensia Mayuh, Pengawa Berumah enggau Perintah Lokal Datuk Dr. Penguang Manggil nyadi Chairman Komiti Pengatur Gawai Dayak Renggat Sarawak 2026 sereta disaup Sapit Sekretari Perintah Sarawak (Administrasyen), Datu Felicia Tan Ya Hua ke nyadi Sapit Chairperson.
Bela dipadu iya nya Direktor Opis Kereja Raya Sarawak, Datu Adj. Prof. Ir. Ts. Gs. Br. PMr. Dr. Cassidy Morris nyadi Sekretari, Sapit Sekretari Mendam Opis Menteri Pengerai Mensia Mayuh, Pengawa Berumah enggau Perintah Lokal, Desmond Douglas Jerukan (Sapit Sekretari) sereta Penolong Akauntan Negeri, Rolend Tama (Tukang Wang).
Sama datai ba aum nya, Sapit Menteri ba Opis Premier Sarawak (Pengereja Kasar, Imigresyen enggau Patau Projek) ti mega Chairman Komiti Pengatur Gawai Dayak Renggat Sarawak 2025, Datuk Gerawat Gala, raban Menteri enggau Sapit Menteri Kabinet Sarawak, raban Kaban Kunsil Nengeri Sarawak, raban Sekretari Politi Premier Sarawak, raban Sekretari Mendam Opis Menteri, raban Tuai Opis Perintah sereta pengari macham agensi.
Maya aum nya mega, Datuk Gerawat bela bejuraika ripot bekaul perambu pun pengawa ngatur, lalu Rolend Tama ngari ke Komiti Besai bejuraika ripot belanja nyadi lalau sereta atur nangkan nya.
Pengerami Gawai Dayak Renggat Sarawak diatur ninting taun nyadi pelasar ngangkat daya idup sereta main asal rayat Dayak kelimpah ngenegap penyerakup sereta mandangka pesaka Sarawak.-EDISI UKAS
