KUCHING: Replika tawak ti nyadi ikon pesaka asal komuniti Dayak di Kampung Quop Dayak ditu deka diseruri ngena agih belanja sepenyampau RM30,000.
Kaban Kunsil Nengeri (ADUN) Stakan, Datuk Hamzah Brahim mega ngemendar agih belanja nya lebuh bejadi replika tawak serimbai Pengerami Gawai Dayak ba Simpang Rundim, Kampung Quop Dayak, kena Hari Dua.
Ku iya, endur nya bisi pengulih dikemansang nyadi palan penyangkai sereta pematak endur begambar ngagai bala pengusung ti betengahka jalai nya.
“Aku deka replika tu digaga manah agi enggau baka tawak ti bendar ngambi dikemegah peranak menua sereta ulih narit perati mensia mayuh ti betengahka endur tu,” ku iya.
Nambah ke nya, Datuk Hamzah muji pengawa peranak Kampung Quop Dayak ti bebendar nyaga identiti budaya enggau adat tradisyen taja arus pemansang moden majak mansang.
Ku iya, tawak ukai semina kereban muzik asal, tang mega nyadi lambang pesaka asal, sejarah enggau ngemegah komuniti Dayak ti meseti terus ditan ke pemaik rebak dudi.
“Taja jeman udah berubah lalu rebak diatu majak ngasai ke teknologi, pengawa ngetan lambang budaya baka tawak tu beguna amat nentuka sejarah enggau adat asal komuniti Dayak meruan dikeingat,” ku iya. - EDISI UKAS
