DALAT: Pengeleda bekaul pemesai guna beperesa tumu riman tusu enggau riman serviks meseti terus ditegap nentuka mayuh agi indu datai beperesa pengerai lalu nambah peluang berubat ti ngasi agi.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, akses ngagai servis pengerai bekualiti meseti terus dikerembai nentuka pemaik nya ulih diasai ke serap komuniti nyengkaum komuniti menua pesisir.
Ku iya, timbal ti diterima sepanjai Program Beperesa Riman Tusu enggau HPV DNA nunjukka tikas pengeleda mensia mayuh nyaga pengerai majak nambah.
Iya madah munyi nya ba Pengawa Nutup Program Beperesa Riman Tusu enggau HPV DNA ti diatur di Gelanggang Futsal Kampung Sungai Kut Muara, Dalat, kena Hari Satu.
Ku iya, riman tusu nya agi entara penyakit ti pemadu mayuh ditepan indu di Malaysia tang mayuh pesakit semina berubat lebuh penyakit nya ba tikas tinggi.
“Pekara tu ngachau peluang pesakit berubat nemban agi. Nya kebuah, pengawa nyidi tumu nengah program beperesa meseti terus ditegap,” ku iya.
Nambah ke nya, iya madah ke inisiatif ngabas ti dipejalai Sarawak Breast Cancer Support Group (SBCSG) beguna amat nentuka indu ba kandang menua pesisir bulih akses ngagai penerang pengerai, beperesa klinikal tusu enggau beperesa tumu muntang agi.
Ngenang riman serviks, ku iya, penyakit nya keruga besai ngagai indu lalu Sarawak entara nengeri ti ngerikod tikas riman serviks tinggi ba menua tu.
Ku iya, pengawa beperesa HPV DNA nya chara pemadu manah ba pengawa nyidi tumu kelimpah nyaup raban indu mereti ke risiko penyakit sereta bejalaika pengawa nagang ti patut.
Iya mega ngelalau raban indu anang nejuka pengerai diri lalu nentuka pengawa beperesa belebuh nyadi chara ke pengelantang ruang bilik enggau orang ti dikesayau.
Nambah ke nya, iya meri terima kasih ngagai staf pengerai ari Klinik Pengerai Indai enggau Anak Dalat sereta Opis Pengerai Bagi Menua Mukah ke pengeran enggau kerejasama ngemujur program nya.
Ku iya, kerejasama rat entara gerempung ukai dikuasa perintah, agensi pengerai enggau perintah nengeri terus ditegap dikena ngerembai program narak pengeleda sereta nyidi tumu penyakit entara mensia mayuh.
Iya mega meri terima kasih ngagai SBCSG ti majak ngesan pangku pengawa besai nambah pengeleda mensia mayuh bekaul riman tusu nengah bemacham program pelajar pengerai, kimpin narak pengeleda enggau aktiviti sukung ngagai pesakit. - EDISI UKAS
