KUCHING: Tradisyen ngabang maya Gawai Dayak terus nyadi pelasar besai negut kaul penyerakup enggau nyempil kaul entara rayat pupu bansa di Sarawak.
Sapit Menteri Besai Datuk Amar Fadillah Yusof madah, tradisyen ngabang ti dikemeran komuniti Iban ukai semina ngabang maya musin pengerami, tang mega nyadi pelasar negut kaul bebakih, ngerami pengelain enggau narak semangat begulai.
“Nengah tradisyen tu mih kaul bebakih ditegap, pekara bebida dirami enggau semangat begulai majak richah,” ku iya.
Iya madah munyi nya ba siti penerang ba media rama pengudah ngabang ngagai rumah ex-Sapit Kepala Menteri Sarawak Datuk Patinggi Tan Sri (Dr) Alfred Jabu Numpang serimbai Pengerami Gawai Dayak kena Hari Satu.
Bela datai, Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ti nyadi temuai dipebasa disempulang Sapit Premier Sarawak Datuk Amar Profesor Dr Sim Kui Hian enggau Speaker Kunsil Nengeri Sarawak Tan Sri Datuk Amar Mohamad Asfia Awang Nassar.
Datuk Amar Fadillah mega madah, pengawa ngabang dikena betemu enggau nanya berita bakih lama sereta ngerami Gawai enggau gaga sereta semangat diri sebilik.
Ku iya, tuchum gaga ti dikunsi sereta betemu kelai pengelantang ti semampai nyadi pengelebih nengeri tu.
Ba penemu iya, tu mih penyelai Sarawak ti kaya enggau bemacham budaya enggau tradisyen tang semampai dipegulai nengah reti bela bebasa, sepenemu enggau kaul ti teguh.
“Ba pengelain tu mih kitai bisi peneguh ti ngujungka Sarawak nyadi chunto pengelantang enggau penyerakup ti dikemegah,” terang iya.
Nya kebuah, iya ngarap ke semangat Gawai majak nyadi jematan ti nyambung ati, ngerapit kaul bebakih enggau beterima kasih laban begulai ngasai ke pengelikun enggau pengelantang. - EDISI UKAS
