MIRI: Misyen penerebai ‘Mercy Flight’ dikena mai siku pesakit raya ari Long Itam Asal, Baram ke Hospital Miri kena Hari Enam tu tadi mandangka pengeran perintah nentuka peranak ba menua ulu bulih akses ngagai bantu ngenyit.

Kaban Kunsil Nengeri (ADUN) Telang Usan, Datuk Dennis Ngau madah, pemujur operasyen nya asil kerejasama lengkas Opis Bomba enggau Penyah Penusah Malaysia (JBPM), Opis Pengerai, Opis Residen Bagi Menua Miri, Hospital Miri sereta peranak genturung pendiau.

Ku iya, operasyen mai ngena jalai langit nya dipejalai pengudah genturung pendiau nya enda ulih dilawa ketegal gaya jalai batang lama ti balat jai enggau enda agi ulih ditengah entukar seraya ngujungka pengawa mai pesakit nengah jalai darat mar dikereja.

“Aku meri terima kasih ngagai semua raban kelebih agi raban bomba enggau staf pengerai ti udah meri timbal lengkas nentuka pesakit nya diperubat lengkas di hospital.

"Terima kasih laban nyaup ngidupka nyawa siku anak menua ulu Telang Usan taja napi pemar jalai penyambung enggau logistik,” terang iya kena Hari Satu.

Kena Hari Enam, Datuk Dennis ba ba rantau jalai ari Miri ke Long Kevuk nerima kangau ari pengari pengerai Kampung Ba Itam Bunau nerang ke gaya pesakit ti nyau raja lalu patut dianjung lengkas ke hospital.

Udah nya, iya telefon ngagai agensi bekaul ngambi nyaup operasyen mai pesakit nengah jalai langit ba hari ti sama. - EDISI UKAS