PAKAN: Tuai menua dipinta ngenegap penemu digital dikena nentuka komuniti menua pesisir enda tinggal ari arus pemansang.
Kaban Kunsil Nengeri (ADUN) Pakan, Tan Sri William Mawan Ikom madah, landik literasi digital beguna endar, lebih agi ba belajar ke pemansang teknologi baka mata duit digital, kod QR, e-wallet, Artificial Intelligence (AI) sereta Internet of Things (IoT).
Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) nya nerang, Tuai Komuniti enggau Tuai Raban Bansa (KMKK) enggau Komiti Pengelikun enggau Pemansang Genturung Pendiau (JKKK) patut berati sereta besedia nyikap diri enggau ubah teknologi dikena nambah pemujur atur enggau ngenatai servis ngagai peranak menua.
Iya madah munyi nya maya ngulu Program Nyua Setipikit Chiri Tuai Bansa, Setipikit Komiti Pengelikun enggau Pemansang Genturung sereta Setipikit Sekretari JKKK N.47 di Pakan, Hari Empat.
Maya nya mega, iya madah, semangat beserakup ba raban tuai komunit patut ditegap, kelimpah tuai bansa enggau tuai rumah megai pengawa nyadi chunto meri peransang nerima teknologi dalam komuniti.
Iya mega meri tabi puji ngagai semua penerima setipikit sereta ngarap sida ulih bejalaika pengawa enggau bendar ungkup pengelantang rayat menua.
Bisi 20 iku nerima setipikit chiri KMKK, lalu 28 agi nerima setipikit nyadi kaban JKKK ari Tan Sri William Mawan. - EDISI UKAS
