BETONG: Empat peranak ba sitak Kunsil Nengeri (DUN) Layar nerima pemaik ari pengawa bejalaika projek nyeruri rumah nengah Program Berumah Rayat Lantang (PPRS).

Pengawa nyerah projek tembu nya diatur ba sekeda endur baka Rumah Panjai Stambak Ili, Nanga Ban, Semumok Atas enggau Lempaong lalu dikemata Sapit Menteri Nembiak, Lumba enggau Pemansang Orang Dagang Sarawak ti nyadi Kaban Kunsil Nengeri (ADUN) Layar, Datuk Gerald Rentap Jabu.

Iya mega meri terima kasih ngagai semua agensi bekaul laban mujur nentuka pengawa nyeruri tembu nitih timpuh ti ditetap.

Ku iya, pejalai projek nya nentuka penerima ngasai rumah ti lantang enggau likun agi seraya nyamin pengelantang peranak menua pesisir.

Projek PPRS nya dipelanja Opis Menteri Pemansang Genturung Pendiau enggau Kandang Menua (KKDW) lalu Opis Pelilih Betong nyadi agensi pengatur seraya Opis Kereja Raya (JKR) Betong nyadi agensi teknikal.

Genap penerima nerima agih belanja sepenyampau RM20,000 ungkup pengawa nyeruri rumah enggau timpuh pengelama empat minggu, belabuh ari 30 Januari nyentuk 28 Februari 2026.

Siku ari penerima, Ugam Sang ari rumah panjai Stambak Ili berasai lantang enggau meri terima kasih ngagai perintah laban milih iya nyadi entara penerima projek PPRS taun tu.

Nya kebuah, iya madah ke bantu nya besai reti dikena nyamin pengelantang enggau pengelikun rumah sida sebilik.

Sama datai, Penulung Pegawai Tadbir Opis Pelilih Betong Christina Peter, Pegawai Teknikal ari JKR Bagi Menua Betong Christina Bada sereta Penghulu Sitak Layar Ili Sebastian Randi.-EDISI UKAS