Sapit Menteri Pengawa Bekebun Bedandang Besai enggau Komoditi ti mega Kaban Parlimen Sarikei Dato’ Sri Huang Tiong Sii madah, fasiliti nya meri penerang tumu ngagai nembiak ba pengawa ngena teknologi sereta nguasa pengelandik digital ti majak beguna kemaya hari.

 

“Nengah pemisi fasiliti tu, nembiak ulih diterang tumu agi bekaul teknologi sereta nguasa pengelandik digital ti beguna amat dikena nambah semekih sida dudi hari.

 

“Tu mega nyadi pemun nampung pelajar enggau tama ngagai sektor gawa,” ku iya ba Pengerami Ngintu Taun Baru China, Hari Begulai enggau Sekula sereta Bejadi Bilik Digital di SJK Su Tak, ditu kena Hari Enam.

 

Sama datai, Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Amar Profesor Dr Sim Kui Hian.

 

Nambah ke nya, Dato Sri Huang andal ke komitmen bala pengajar sereta sukung apai indai deka terus mantu nembiak mansang ba palan belajar ti lantang enggau besemekih agi.

 

Ku iya, SJK Su Tak ba sitak Sungai Pasi semak jalai besai Sarikei–Bintangor mega nerima empas positif berindik ari pengawa ngaga jalai penyambung ari Sungai Pasi ke Tanjung Manis taun nyin tadi.

 

Ku iya, infrastruktur nya ukai semina nambah aksesibiliti tang mega meransang pemansang lokal sereta matak mayuh agi peranak ke Sarikei.

 

Ku iya, penyampau tubuh peranak ti nambah dikeandal deka nambah penatai nembiak ke sekula SJK Su Tak seraya negap pengulih pemansang pelajar dia.

 

Pia mega, Kaban Kunsil Nengeri (ADUN) Repokmega meri terima kasih ngagai iring Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, ti terus nentuka politik enggau pemansang ekonomi Sarawak tegap.

 

Iya madah, penyerakup rayat pupu bansa nyadi pugu beguna nyungkak pemansang Sarikei enggau Meradong nuju pemansang ti gah agi.

 

Ba pengawa nya, Dato’ Sri Huang mega ngagihka belanja RM20,000 ngagai SJK Su Ming kelai sukung meruan ngagai pemansang pelajar ba sitak Sarikei.-EDISI UKAS