BETONG: Projek pemansang nengah Agensi Pemansang Bagi Menua Betong (BDDA) diatu ba Renggat Kedua ti meri perati ngagai pemansang sosioekonomi pengudah Renggat Keterubah sebedau tu meri perati ngagai pejalai projek infrastruktur pemun.

Sapit Menteri Nembiak, Lumba enggau Pemansang Orang Dagang Sarawak Datuk Gerald Rentap Jabu madah, projek fizikal baka ngaga enggau nyeruri jalai dikemerat ba Renggat Keterubah laban nya pugu pemansang sosial enggau ekonomi komuniti menua pesisir.

Tang, ku iya, genap projek meseti nengah atur berurun nyengkaum nyiri konsultan, nyendia kar teknikal, tungkap taba enggau tinda ti suah begunaka timpuh berapa bulan sebedau sebarang pengawa belabuh dipejalai.

“Sebagi ari projek udah dilanggur kenyau ari taun 2020 lalu diatu ba mayuh renggat dipejalai.

“Kitai mega napi penanggul suntuk injinir enggau pegawai teknikal ba agensi pengatur baka Opis Kereja Raya (JKR), kelebih agi ngaul mayuh projek ti dipejalai seretai,” ku iya.

Iya madah munyi nya ba Pengawa Merarau Gerempung Tuai Rumah (GTR) N.36 Layar di Parish Hall, Gereja St Augustine, kena Hari Enam.

Berebak enggau nya, Datuk Gerald minta bala tuai komuniti baka pemancha, penghulu enggau tuai rumah ngambi ransing bekunsi penerang ti betul ngagai rayat dikena nyeliah saru penemu.

Kaban Kunsil Nengeri (ADUN) Layar nya mega nerang, randau nyadi kunchi nentuka rayat mereti ke atur nyadi siti tim tang pekara ti pemadu beguna deka terus diangkat ngambi dikenulu.

Iya mega ngemendar agih belanja sepenyampau RM35,000 ngagai GTR N.36 Layar dikena ngemujur aktiviti gerempung nya.

Kaban Parlimen Betong Dato Dr Richard Rapu mega ngemendar geran sepenyampau RM15,000 dikena nyaup ngemujur aktiviti gerempung nya sepanjai taun tu.

Ke rikod, Program GTR N.36 Layar diatur serimbai Aum Besai 2026/2027 dikena milih Kaban Komiti (AJK) baru ungkup timpuh nya. - EDISI UKAS